ඉදිරියේදී පැවැත්වෙන පළාත් සභා හා පළාත් පාලන මැතිවරණවලදී කාන්තා නියෝජනත්වය වැඩිකිරීම පිළිබඳව මෙහිදී දීර්ඝ වශයෙන් සාකච්ඡා කරන ලදී.
මැතිවරණ ක්‍රමය යටතේ කාන්තා නියෝජනය වැඩිකිරීමට හැකි විකල්ප යෝජනා අවම වශයෙන් තුනක්වත් ඉදිරිපත් කරන ලෙසට අග්‍රාමාත්‍යවරයා උපදෙස් දුන්නේය.
මැතිවරණ කොමසාරිවරයා ද මෙහිදී අදහස් දැක්වූ අතර මැතිවරණ කොමසාරිස්වරයාගේ ප්‍රධානත්වයෙන් මාර්තු 03 වන දින නැවත සාකච්ඡාවක් පැවැත්වීමටද තීරණය විය.
ආසියානු කලාපයේ වෙනත් රටවල මැතිවරණ ක්‍රමය තුළ කාන්තා නියෝජනය ඉහළ මට්ටමක පවතින බැවින් එයට සාපේක්ෂව අප රටේ ද කාන්තා නියෝජනයේ සැබෑ වර්ධනයක් සිදු කිරීම නව රජයේ අභිලාශය වන බව මෙහිදී අග්‍රාමාත්‍යවරයා පවසා තිබේ.
පළාත් පාලන මැතිවරණයේදී අවම වශයෙන් එක් සභාවකට යටත් පිරිසෙයින් ආසන 03ක් කාන්තාවන්ට තරග කිරීම සඳහා වෙන් කිරීම, එක් සභාවකට යටත් පිරිසෙයින් සමානුපාතික ක්‍රමය යටතේ යටතේ වන 30% තුළ 40% ක් නාමයෝජනා කාන්තාවන්ට ලබාදීම ආදී වශයෙන් වූ යෝජනා රැසක් විස්තරාත්මකව මෙහිදී සාකච්ඡා විය.
මාර්තු 10 වන දින බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේදී පැවැත්වෙන පාර්ලිමේන්තු මන්ත්‍රීවරියන්ගේ රැස්වීමේ දී මේ පිළිබඳව පුළුල්ව සාකච්ඡාවට ගැනීමටත්, මාර්තු මස අවසානයේදී පැවැත්වෙන පක්ෂ රැස්වීමට සියලු යෝජනා ඉදිරිපත් කොට එම පක්ෂවල යෝජනා හා අනුමැතිය ලබා ගැනීමටත් මෙහිදී තවදුරටත් තීරණය වී තිබේ.
බුද්ධ ශාසන, රාජ්‍ය පරිපාලන, පළාත් සභා හා පළාත් පාලන සහ ප්‍රජාතන්ත්‍රීය පාලනය පිළිබඳ අමාත්‍ය කරු ජයසූරිය මහතා, කාන්තා කටයුතු අමාත්‍ය චන්ද්‍රාණි බණ්ඩාර මහත්මිය, ළමා කටයුතු රාජ්‍ය අමාත්‍ය රෝසි සේනානායක මහත්මිය, මැතිවරණ කොමසාරිස් මහින්ද දේශප්‍රිය මහතා, අතිරේක කොමසාරිස් එම්.යූ. මොහොමඞ් මහතා, කාන්තා කටයුතු අමාත්‍යාංශයේ ලේකම් සුධර්මා කරුණාරත්න මහත්මිය, අතිරේක ලේකම් සුසීමා විජේසේකර මහත්මිය, කාන්තා කමිටුවේ සභාපති ස්වර්ණා සුමනසේකර මහත්මිය, විධායක අධ්‍යක්ෂ අනුලා ඉන්ද්‍රාණි මහත්මිය, කාන්තා කාර්යාංශයේ අධ්‍යක්ෂිකා චූලානන්ද මහත්මිය ඇතුළු නිලධාරීහු පිරිසක් සාකච්ඡාවට සහභාගී වූහ.
PR
