එම නිවේදනයේ දැක්වෙන පරිදි මනුෂ්‍ය පරිභෝජනයට නුසුදුසු ආහාර සන්තකයේ ඇති සෑම තැනැත්තෙක් ම ඒ පිළිබඳ පූර්ණ විස්තරයක් වහාම තම ප්‍රදේශයේ ආහාර බලධරයා වෙත දැනුම් දිය යුතු අතර එම ආහාර සුරක්ෂිත ආකාරයට සාමාන්‍ය ආහාරවලින් වෙන් ව හඳුනාගත හැකි සේ ගබඩා කිරීමට ද කටයුතු කළ යුතුයි.
මනුෂ්‍ය පරිභෝජනයට නුසුදුසු ආහාර ප්‍රවාහනය කිරීම දිස්ත්‍රික්කය තුළ නම් දිස්ත්‍රික් සෞඛ්‍ය අධ්‍යක්ෂවරයා විසින් ද දිස්ත්‍රික්ක හෝ පළාත් අතර නම් ප්‍රධාන ආහාර බලධරයාගෙන් ද පූර්ව අනුමැතිය ලබා ගත යුතුයි. හදිසි අවස්ථාවන් හිදී අදාළ ප්‍රදේශවල ආහාර බලධාරීන් අතර එකඟත්වයෙන් ප්‍රවාහනය සිදු කර ප්‍රධාන ආහාර බලධරයාගේ ආවරණ අනුමැතිය ලබා ගැනීම පිළිබඳ විරුද්ධත්වයක් නොමැති බව ද එහි සඳහන් වේ.
මෙහිදී ආහාර බැහැරලීම සඳහා යන වියදම් ආහාර සන්තකය දරන්නා විසින් දැරිය යුතු අතර අවශ්‍ය පහසුකම් ද එම ක්‍රමවේදය නිමවන තුරු සැපයිය යුතු වේ. තවද ප්‍රදේශයේ බලයලත් නිලධාරියාගේ අධීක්ෂණය යටතේ සෞඛ්‍යාරක්ෂිත ක්‍රමවේදයකට ආහාර බැහැරලීම හෝ විනාශ කිරීම කළ යුතු අතර ඊට පෙර තොග සම්බන්ධ සවිස්තර වාර්තාවක් සමඟ සන්තකය දරන්නාගේ ලිඛිත කැමැත්ත ලබා ගත යුතු වේ.
එම සියලු කටයුතු ඉටුකිරීමේදී ආහාර පනතේ අංක 5 හා අංක 15(1) වගන්තිය අනුකූලව කටයුතු කළ යුතු බව ද එම නිවේදනයේ වැඩිදුරටත් සඳහන් වේ.
NDH
