ශ්‍රී ලංකාවේ පැවැත්වෙන වාර්ෂික උත්සව අතර සිංහල, හින්දු ජන සමගිය තහවුරු කෙරෙන බක්මහ උළෙල දේශීය අනන්‍යතාවයේ සංස්කෘතික මංගල්‍යයයි. ජාතික වශයෙන් වැදගත් වන සිරිත්, ජන ක්‍රීඩා, කෙළි සෙල්ලම් සතුටු සාදවලින් දසත මංගල සිරියෙන් ඇළලී යන වසන්ත සැණකෙළිය ගමත් නරගයත් ඒකාත්මික කරන අවස්ථාවකි.
තුරු ලතාවෝ මලින් පලින් බරවෙති. සත්ව සමූහයෝ පිබිදෙති. පරිසරය අමුතුම නැවුම් බවක් ගනී. සරු අස්වනු ගෙට ගැනීමෙන් අනතුරුව බක්මහේ ජයග්‍රාහී නාද නැඟෙන්නේ අලුත් අවුරුදු උදාවේ දී ය. රතිඤ්ඤා, මල් වෙඩි, උණ වෙඩි හඬ ඇසෙන සතර දිග්භාගයම ප්‍රබෝධවත්ය. රැහැයි නාදයත්, කොවුල් මිහිරියාවත්, එරබදු දෙවැටත් අලුත් අවුරුදු උදාවේ සලකුණු ලෙස එදා පෙනුණු අයුරු අපට තවමත් මිහිරි මතකයකි. උතුර දකුණ යා කරමින් තල් - පොල් දෙවැටකින් නොබෙදී යුද බිය තුරන් කළ නිදහස් මව්බිමේ අවුරුදු සතුට විඳ ගන්නට තරම් ඔබ මා පිංවන්තයෝ වූහ.
DB
