විද්‍යාලයේ ආදි ශිෂ්‍යයෙකු ද වන ප්‍රධාන අමුත්තා වූ ගෝඨාභය රාජපක්ෂ මහතා විදුහල්පති කිත්සිරි ලියනගමගේ මහතා ඇතුළු නියෝජ්‍ය විදුහල්පතිවරුන් විසින් පිළිගැනීමෙන් අනතුරුව නේවාසිකාගාරයේ සවිකර තිබූ සිහිවටන එලකය නිරාවරණය කරන ලදී.
මෙහිදී සිය අදහස් පළ කළ ආරක්ෂක ලේකම්වරයා විසින් රටේ සංවර්ධනයට මෙන්ම තිස් වසරක් පුරා අප රටේ තිබූ දරුණු ත්‍රස්තවාදය මෙරටින් තුරන් කිරීම සඳහා ආනන්ද විද්‍යාලයේ ආදි ශිෂ්‍යයින්ගෙන් සිදුවූ කාර්යභාරය ඇගයීමට ලක් කළේය.
ඉන් අනතුරුව පිළියෙල කර තිබූ එළිමහන් වේදිකාව වෙත පැමිණි ප්‍රධාන අමුත්තා ඇතුළු පිරිස විසින් සම්ප්‍රදායානුකූලව පොල්තෙල් පහන දැල්වීමෙන් අනතුරුව ප්‍රවීණ ගායක ගායිකාවන් වන විශාරද එඩ්වඩ් ජයකොඩි, සංගීත් නිපුන් සනත් නන්දසිරි, භාතිය සන්තුස්, ජනනාත් වරකාගොඩ හා නිරෝෂා විරාජිනී යන අය සහභාගීවූ සංගීත සංදර්ශණයක් නැරඹීම සඳහා එක්විය. එසේම චන්න උපුලී නර්ථනායතනය විසින් ඉදිරිපත් කරන ලද නර්ථනයන්ගෙන් ද මෙම වේදිකාව බොහෝ සේ වර්ණවත් කරනු ලැබීය.
මෙම අවස්ථාව සඳහා අවට පාසැල්වල විදුහල්පතිවරුන්, ආනන්ද විද්‍යාලයේ ආදි ශිෂ්‍යයින්, ආචාර්ය මණ්ඩලයේ ගුරුභවතුන් හා ශිෂ්‍යයෝ විශාල පිරිසක් සහභාගී වුහ.
DB
