ශී‍්‍ර ලංකාව වෙනුවෙන් පාර්ලිමේන්තු ප‍්‍රතිසංස්කරණ හා ජනමාධ්‍ය අමාත්‍යාංශයේ ලේකම් වජිර නාරම්පනාව මහතා සහ රුසියානු ජනරජය වෙනුවෙන් විදුලි සංදේශ සහ ජනසන්නිවේදන අමාත්‍ය නිකොලේ නිකිෆොරොව් (Hon.Nikolay Nikiforov ) මහතා අත්සන් තැබූහ.
ස්වාධීනත්වය, ජාතික ස්වෛරීභාවය, සමානාත්මතාවය සහ අනෙකුත් රාජ්‍යයන්හි අභ්‍යන්තර කටයුතුවලට මැදිහත් නොවීම යන මූලධර්ම මත පදනම්ව දෙරට අතර අන්‍යෝන්‍ය අවබෝධය සවිමත් කිරීමේ අරමුණින් මෙම ගිවිසුමට එළඹ ඇත.
වගන්ති 10කින් සමන්විත ගිවිසුම් ප‍්‍රකාරව රුසියාවේ සහ ශී‍්‍ර ලංකාවේ ජනසන්නිවේදනය පිළිබඳ උනන්දුවක් දක්වන සංවිධාන, දෙරටේ ප්රවෘත්ති ඒජන්සි සහ ගුවන් විදුලි සේවා ආයතනයන්ට අන්‍යෝන්‍ය වශයෙන් සහයෝගිතා පහසුකම් සැලසීමට එකඟ වී ඇත.
මෙම රාජ්‍යයන් මඟින් බලය පවරන ලද ජන සන්නිවේදන ඒජන්සි, ජන නාට්‍යකරුවන් සහ රූපවාහිනි කණ්ඩායම්වලට එකිනෙක රාජ්‍ය තුළ ප්රවෘත්ති වාර්තා සැකසීමට (ව්‍යාපාර සබඳතා සම්බන්ධ පුවත් විශේෂිතයි) අවශ්‍ය වාතාවරණය සකසා දිය යුතුවේ.
ජනතාවගේ ප්රවෘත්ති හා සංස්කෘතික අවශ්‍යතාවයන් සපුරාලිමින් එකිනෙක රාජ්‍යන්හි ගුවන්විදුලි වැඩසටහන් ආවරණය පුළුල් කිරීමටත්, පොත් ප‍්‍රකාශකයින්ට සහ බෙදාහරින්නන්ට ස්වකීය රාජ්‍යන් තුළ සුදුසු පරිසරයන් තහවුරු කිරීමට අවශ්‍ය සහයෝගීතාවය වර්ධනය කිරීමටද මෙම ගිවිසුම මඟින් අවකාශ සලසා දී ඇත.
එසේම දෙරටෙන් කුමන හෝ රාජ්‍යයක පැවැත්වෙන ජාත්‍යන්තර ප‍්‍රදර්ශන, සල්පිල්, මෙන්ම ජන සන්නිවේදන හා පොත් ප‍්‍රකාශන අවස්ථා මෙන්ම අනෙකුත් උත්සව අවස්ථාවන්ට අන්‍යෝන්‍ය වශයෙන් සහභාගි වෙමින් සහය ලබා දීමටද මෙම ගිවිසුමෙන් එකඟ වී ඇත. තවද මෙම ගිවිසුමට අනුව එකිනෙක රාජ්‍යයන්හි ජනසන්නිවේදන හා පොත් ප‍්‍රකාශන බාධාවකින් තොරව ලබා ගැනීමේ සම අයිතියද දෙරටෙහි පුරවැසියන්ට තහවුරු වී ඇත.
මෙම ගිවිසුමෙහි වලංගු කාලය වසර පහකි. 1999 ජනවාරි 26 දින ශී‍්‍ර ලංකා රජය සහ රුසියානු සමූහාණ්ඩුව අතර ඇති කරගත් විද්‍යා හා සංස්කෘතික සහයෝගිතා ගිවිසුම කෙරෙහි අවධානය යොමු කරමින් දෙපාර්ශවය මෙම නව සහයෝගිතා ගිවිසුමට එළඹිණ.
මෙම අවස්ථාවට රුසියාවේ විදුලි සංදේශ සහ ජනසන්නිවේදන නියෝජ්‍ය අමාත්‍යවරුන් වන රෂීඞ් ඉස්මයිලව් (Hon.Rashid Ismailov) සහ ඇලෙක්සි වොලින් (Hon.Alexey Volin) යන මහත්වරුන් රුසියාවේ ශී‍්‍ර ලංකා තානාපති ආචාර්ය සමන් වීරසිංහ මහතා, සහ ශී‍්‍ර ලංකාවේ රුසියානු තානාපති ඇලෙක්සැන්ඩර් කර්චාවා (H.E.Alexander Karchava) මහතාද සහභාගි වූහ.
