පසුගිය දින ගණනාවක් පුරා නේපාලය තුළ ඔවුන් කළ එම සුවිශේෂී ක්‍රියාන්විතය ලොවටම ආදර්ශයක් වූ බවත් ඒ සඳහා ඔවුන් දක්වා ඇති ප්‍රතිචාරවලින් ඔප්පු වී ඇති බව අවධාරණය කළ හමුදාපතිවරයා ඔවුන්ගේ එම කැපවීම අගයා නේපාල රජයත් තානාපතිවරු සහ නේපාල බනීෂා විහාරස්ථානයේ විහාරාධිපති හාමුදුරුවන් වහන්සේද එම හමුදා භට පිරිස් වෙත සමරු තිළිණ සහ ඇගයීමේ සහතික ද මෙරටට එවා ඇති බවද මෙහිදී සඳහන් කළේය.
නේපාල කත්මණ්ඩු මෙහෙයුමට සහභාගී වූ යුද, ගුවන්, නාවික හමුදා නිලධාරීන් 144 දෙනෙක් මෙහිදී ඇගයීමට ලක් කෙරුනු අතර ක්‍රිෂාන්ත ද සිල්වා මහතා විසින් මෙහිදී නේපාල රජය මෙන්ම එහි හමුදාපතිවරයා ඇතුළු විවිධ අංශ මගින් අප හමුදාවේ කාර්යභාරය අගයමින් ප්‍රදානය කරන ලද තිළිණ සහ සහතික පත් එම සහන කණ්ඩායම මෙහෙයවූ මේජර් ජෙනරාල් එම්.එම්. එන්. ඩයස් ඇතුළු නිලධාරීන් වෙත බාරදීම ද සිදු කරන ලදී.
එසේම නේපාල කත්මණ්ඩු නුවර භූ චලනය සිදු වී ඉතා කෙටි කාලයක් තුළ එරටට ගිය ප්‍රථම සහන කණ්ඩායම් බවට අපේ හමුදාවන් පත්වීම මෙරටට මහත් ගෞරවයක් බව යුද්ධ හමුදාපතිවරයා මෙහිදී පැවසීය. ත්‍රිවිධ හමුදාවට අමතරව සෞඛ්‍ය අමාත්‍යංශයේ වෛද්‍යවරු සිවු දෙනෙක් රජයෙන් කළ ඉල්ලීමට ගෞරව කරමින් එරට ජනතාවට පිහිටවීමට හමුදාව සමග කැපවූ ආකාරය ද හමුදාපතිවරයාගේ ඇගයීමට ලක් කළේය.
සේනාධිනායක ජනාධිපති මෛත්‍රීපාල සිරිසේන මහතාගේ සහ අග්‍රාමාත්‍ය රනිල් වික්‍රමසිංහ මහතාගේ උපදෙස් පිළිපදිමින් ගෞරවණීය සහ විනයගරුක, කාර්යක්ෂම, හමුදාවක් ලෙස අපේ හමුදා සහන කණ්ඩායම් කළ කැපවීම සුවිශේෂී කර්තව්‍යයක් බව පෙන්වා දුන් හමුදාපතිවරයා ඔවුන් ඕනෑම අවස්ථාවකට මුහුණ දිය හැකි පරිදි ලබා තිබූ පුහුණුව සහ එම මෙහෙයුම සාර්ථක කර ගැනීමට ඉවහල් වූ බවද මෙහිදී පෙන්වා දුන්නේය.
DB
