එම පණිවුඩයේ වැඩිදුරටත් මෙසේ සඳහන් වෙයි.
“අග්‍රාමාත්‍යවරිය සහ ශ්‍රී ලංකාවේ කාන්තා, ළමා හා යෞවන කටයුතු සහ ක්‍රීඩා අමාත්‍යවරිය ලෙස මගේ පළමු පණිවිඩය ලෝක ළමා දිනය සහ වැඩිහිටි දිනය වෙනුවෙන් ඉදිරිපත් කිරීමට ලැබීම මා හට සුවිශේෂී අවස්ථාවකි. අපේ අනාගතය සහ උරුමය සැලකීමේදී ළමයින් සහ වැඩිහිටියන් විශේෂ භූමිකාවන් සිදු කරන බව අපට සිහිපත් කරවයි.
”අපේ අනාගතය සඳහා කරන ආයෝජනයන් යනු අපේ දරුවන් වෙනුවෙන් ආයෝජනය කිරීමයි” යන මෙවර ජාත්‍යන්තර ළමා දින තේමාව, පාඨයකට සීමා නොකර යථාර්තයක් කිරීම අප රජයේ අරමුණයි. රටේ සෑම දරුවකුට ම උසස් තත්ත්වයෙන් යුතු නිදහස් අධ්‍යාපනයක් ලබා දීමට අපි කැප වී සිටිමු.
එමෙන්ම, අධ්‍යාපන ආයතන ද ඇතුළුව සියලු ස්ථානවල ළමයින්ට මුහුණ දීමට සිදු වන කායික හා මානසික හිංසනයන්ට රජයක් ලෙස අපි තරයේ විරුද්ධ වෙමු. ආදරය, කරුණාව, රැකවරණය සහ සතුට පිරුණු පරිසරයක හැදී වැඩෙන දරුවන් දයානුකම්පාව, අවබෝධය සහ අන්‍යෝන්‍ය ගෞරවය සහිත පරම්පරාවක් නිර්මාණය කරයි. සෑමවිටම දරුවන්ගේ උපරිම යහපත වෙනුවෙන් අපගේ ප්‍රමුඛතාවය ලබා දෙන්නෙමු.
අපි වැඩිහිටි දිනය සමරන මොහොතේ, අපේ රටේ ප්‍රගතියට මෙතරම් දායක වූ ජ්‍යෙෂ්ඨ පුරවැසියන් අපි ගෞරවයෙන් සිහිපත් කරන්නෙමු. 2024 ලෝක වැඩිහිටි දින තේමාව වන “ගෞරවාන්විතව වයස්ගත වීම: ලොව පුරා වැඩිහිටි පුද්ගලයින් සඳහා සත්කාර සහ ආධාරක පද්ධති ශක්තිමත් කිරීමේ වැදගත්කම”, ජ්‍යෙෂ්ඨ පුරවැසියන් සඳහා සමාජ ආරක්ෂණය වැඩි දියුණු කිරීම සඳහා වන අප රජයේ ඇති කැපවීම සමඟ සමපාත වෙයි. වැඩිහිටියන් සඳහා, විශේෂයෙන් ශ්‍රම බලකායට දායක වෙමින් තම ජීවිත ගත කළ අය වෙනුවෙන් විශ්‍රාම ප්‍රතිලාභ වැඩිදියුණු කිරීමටත් සෞඛ්‍ය සේවා සඳහා නොමිලේ සහ සමාන ප්‍රවේශයක් සහතික කිරීමටත් අපගේ රජය කැපවී සිටියි. මේ වන විට නිවෙස් තුළ වැටුප් නොලබන සුරැකුම් කටයුතු සඳහා ජ්‍යෙෂ්ඨ පුරවැසියන්ට ද වැඩි වැඩියෙන් දායක වීමට සිදු වී ඇතැයි යන කරුණ පිළිබඳව අපි ඉමහත් ලෙස සංවේදී වෙමු. සුරැකුම් කටයුතුවල වගකීම සාධාරණ ලෙස බෙදා ගැනීම සඳහා පවුල්වලට ප්‍රමාණවත් සහයෝගයක් ලැබෙන බවට සහතික කිරීම අප රජයේ වගකීමයි.
අපගේ දරුවන්ගේ සහ වැඩිහිටියන්ගේ යහපැවැත්ම සඳහා වැඩ කිරීමට අපි අත්වැල් බැඳ ගනිමු. සියලු ශ්‍රී ලාංකිකයන් සඳහා පොහොසත් රටක් සහ ලස්සන ජීවිතයක් ගොඩනැගීමට අපි දිවිහිමියෙන් කැප වී සිටිමු.”
