අන්තර්ජාලය භාවිතා කරමින් මාර්ග ගත ක්‍රමයට (online) බැංකු ගනුදෙනු කිරීමේ දී ගනුදෙනුකරු හඳුනාගැනීම සහ එම ගනුදෙනුවේ සුරක්‍ෂිතතාවය තහවුරු කිරීම සඳහා අදාළ බැංකු ආයතනය මඟින් එක් වරක් පමණක් ලබා දෙන කේත අංකයක් (OTP) ගනුදෙනුකරුවන් වෙත ලබා දීම සිදු කෙරේ.
එම කේතය ඇතැම් පුද්ගලයින් විසින් සමාජ මාධ්‍ය තුළ වට්ටම්, ත්‍යාග සහ දිනුම් ඇදීම ආදිය ලබා දෙන බවට පවසමින් ප්‍රසිද්ධ සන්නාම සහ සේවා ලෙස පෙනී සිටිමින් සංසරණය වන ව්‍යාජ වෙළෙඳ දැන්වීම්වලට හසුව, ව්‍යාජ වෙබ් පිටු වෙත යොමු වී එසේ තමාට ලැබෙන කේත අංක ඇතැම් ගනුදෙනුකරුවන් වෙත නොදැනුවත්කම මත තෙවන පාර්ශ්වයන් වෙත ලබා දීම සිදු කරන බවට නිරීක්ෂණය වී තිබෙන බව ශ්‍රී ලංකා පොලිසිය සඳහන් කරයි.
මෙවැනි සිද්ධීන් රාශියක් මේ වන විට වාර්තා වී ඇති බැවින් මෙම වංචනික ක්‍රියාවන්ගෙන් ආරක්ෂා වීමට අදාළ බැංකු මඟින් ලබා දෙන මාර්ගෝපදේශ නිවැරදිව අනුගමනය කරන ලෙස ශ්‍රී ලංකා පොලීසිය මහජනතාවගෙන් වැඩිදුරටත් ඉල්ලයි.
