අද (22) රජයේ ප්‍රවෘත්ති දෙපාර්තමේන්තුවට විශේෂ ප්‍රකාශයක් කළ අමාත්‍යවරයා ගුරු වර්ජනයට සහභාගී නොවී මාර්ගගත ක්‍රමයට උගන්වන ගුරුවරුන්ට, ගුරු වර්ජනය මෙහෙයවන
පුද්ගලයන් තර්ජනය කරන බවට අපරාධ පරීක්ෂණ පෙදාර්තමේන්තුවට පැමිණිලි කළේ වර්ජනයට එරෙහි ගුරුවරුන් බවත් ඊට කිසිදු දේශපාලන මැදිහත්වීමක් නැති බවත් කීවේය.
වර්ජනය කිරීම ජනතාවගේ ප්‍රජාතාන්තවාදී අයිතියක් වුවද බහුතරයක් ගුරුවරුන් වර්ජනයට එක්ව ඇත්තේ ඔවුන්ගේ කැමැත්තට නොව බලකිරීමටයැයි පෙන්වාදුන් වීරසේකර මහතා දුරකථන ඇමතුම් මගින් ගුරුවරුන් තමාට ඒ බව දැන්වූ බව සඳහන් කළේය.
“උතුරු, නැගෙනහිර සියලුම පාසල්වල ජාත්‍යන්තර සහ පෞද්ගලික පාසල්වලත් ඉගැන්වීමේ කටයුතු අඛණ්ඩව සිදු වෙනවා. අද අනාථ වෙලා ඉන්නේ දකුණේ රජයේ පාසල් දරුවන් පමණයි. මේක ඉතාම අවාසනාවන්ත තත්ත්වයක්. ඒ නිසා මම ගුරුවරුන්ගෙන් කරුණාවෙන් ඉල්ලා සිටිනවා දරුවන්ගේ අනාගතය ගැන හිතලා ඉගැන්වීම් පටන් ගන්න කියලා” අමාත්‍යවරයා පැවසීය.
රජයේ සේවකයන්ගේ රාජකාරියට බාධා කිරීම බරපතල දඬුවම් ලැබිය හැකි වරදක් බව අවධාරණය කළ අමාත්‍ය සරත් වීරසේකර මහතා වර්ජනය නොතකා ඉගැන්වීමෙහි නිරත ගුරුවරුන්ට වචනයකින් හෝ බලපෑමක් කළහොත් දැඩිව නීතිය ක්‍රියාත්මක කරන බව අවධාරණය කළේය
