අමාත්‍යවරයා මේ අදහස් පළ කළේ, ඉදිරියේදී පාසල් විවෘත කිරීම, පවත්වාගෙන යාම සහ ඊට අවශ්‍ය පසුබිම පාසල් පරිශ්‍රය තුළ සකස් කිරීමට අදාළව ගත යුතු පියවර සම්බන්ධයෙන් දිවයිනේ සියලුම පලාත් ආවරණය කරමින් පැවැත්වෙන වැඩසටහන් මාලාවේ, බස්නාහිර පළාතේ සියළු කලාප සහ කොට්ඨාස අධ්‍යාපන අධ්‍යක්ෂකවරුන්ගේ සහභාගිත්වයෙන්, (14) අධ්‍යාපන අමාත්‍යාංශයේ පැවැති විශේෂ හමුවකට එක්වෙමිනි.
රටේ ජනාධිපතිවරයා හුදෙක් දේශපාලනඥයෙක් නොවී, දක්ෂ පරිපාලකයෙක් සහ නූතන තාක්ෂණය පිළිබඳ මනා අවබෝධයකින් කටයුතු කරන්නෙකු වීම නිසා මෙරට අධ්‍යාපන පද්ධතිය තුළ ද නූතන තාක්ෂණයේ ඉදිරි භාවිතාවන් වෙනුවෙන් වැඩි අවධානය යොමු කරන්නට ඉඩප්‍රස්තාව සැලසී ඇති බවද, කොරෝනා වෛරස ව්‍යාප්තය හේතුවෙන් මතුව ඇති අභියෝගය හමුවේ වඩාත් ඉක්මණින් එම තාක්ෂණික භාවිතාවන් අධ්‍යාපන පද්ධතියට යොදාගැනීමට හැකිව ඇති බව ද, මේ වන විටත් ඇතැම් පාසල් පමණක් නොව පිරිවෙන් තුළ පවා තාක්ෂණික පහසුකම් භාවිතයෙන් virtual schools පවත්වාගෙන යාමට ආයතනික මට්ටමින් පියවර ගෙන තිබීම සතුටට කරුණක් බවත් මෙහිදී අදහස් දක්වමින් අමාත්‍යවරයා සඳහන් කළේය. ලොව බොහෝ දියුණු රටවල් පාසල් තුළ ඉගෙනුම් ඉගැන්වීම් ක්‍රියාවලිය සඳහා මේ වන විටත් තාක්ෂණය උපරිමයෙන් යොදා ගන්නා බවත්, ශ්‍රී ලංකාවේ දරුවන් වෙනුවෙන් ද එම පහසුකම් ලබාදීමට පෞද්ගලික අංශයේ ප්‍රබල ව්‍යාපාරිකයන් පවා දායකත්වය ලබාදෙමින් සිටින බවද දරුවන් වෙනුවෙන් වඩාත් යහපත් තීන්දු තීරණ ගැනීම වෙනුවෙන් සෑම මොහොතකම ප්‍රමුඛතාව ලබා දෙන බවද අමාත්‍යවරයා වැඩි දුරටත් සඳහන් කළේය. කෙසේ වෙතත්, තවමත් මෙරට පරිගණක පහසුකම් ඇති ශ්‍රී ලාංකිකයින් ප්‍රමාණය මුළු ජනගහනයෙන් 23% ක් බවත්, රූපවාහිනී පහසුකම් පවතින්නේ 81% කට පමණක් බවත්, ගුවන්විදුලියක් පවා නොමැති පිරිස් ද තවමත් අප රටේ සිටින බවත් අප විසින් හඳුනා ගත යුතු වන බවත්, ඒ සියලු පවුල්වල සිටින්නේ ද අපේ රටේම දරුවන් බවත් අමාත්‍යවරයා අවධාරණය කළේය.
එමෙන්ම, දළ දේශීය නිෂ්පාදිතයෙන් 6% ක් අධ්‍යාපනය වෙනුවෙන් වෙන් කරන ලෙස දේශපාලන වේදිකාවල බොහෝ දෙනෙක් හඬ නගන නමුත්, ගැටලුව පවතින්නේ වෙන් කරගන්නා ප්‍රතිශතයෙහි නොව, බිම් මට්ටම දක්වා ප්‍රායෝගික ව දරුවන්ගේ අධ්‍යාපනය නගා සිටුවීම වෙනුවෙන් එම වෙන්කරගැනීම් ආයෝජනය වන්නේ ද යන්න බවත් අමාත්‍යවරයා සඳහන් කළේය. රට තුළ මතුව ඇති තත්ත්වය වේලාසනින් ම අවබෝධ කරගනිමින් පාසල් වැසීමේ තීන්දුව ගත් පරිදෙන් ම, දරුවන්ගේ සෞඛ්‍යාරක්ෂාව සම්බන්ධයෙන් ගත යුතු සියලූ ක්‍රියාමාර්ග ගෙන, ඒ පිළිබඳ නිවැරදි තහවුරුවක් ලබා ගැනීමකින් පසුව පමණක් පාසල් ආරම්භ කිරීමේ තීරණය ද ගන්නා බව අමාත්‍යවරයා වැඩිදුරටත් පැවසීය.
පාසල් නැවත ආරම්භ කිරීමෙන් පසු සිසුන් වෙනුවෙන් අවම වශයෙන් මුඛ ආවරණ දෙකක් හෝ ලබා දීමටත්, උෂ්ණත්ව මාපක උපකරණ පාසල් වෙත ලබා දීමටත්, අත් සෝදන ජල බේසම් සහ ජල සැපයුම් පද්ධති ලබාදීමටත් විශාල පිරිවැයක් වැයවන බවද, එහෙත් මේ අවස්ථාවේ දෙමාපියන් වෙත බරක් නොවී, රජය එම සෞඛ්‍යාරක්ෂිත පහසුකම් ලබාදීමට කටයුතු කරන බව ද, ඒ සඳහා, පළාත්, කලාප සහ කොට්ඨාස මට්ටමින් අධ්‍යාපන ක්ෂේත්‍රයේ නිරතව සිටින සියලු දෙනාගේ සක්‍රීය දායකත්වය අවශ්‍ය වන බව ද අමාත්‍යවරයා අවධාරණය කළේය
