මධ්‍යම පරිසර අධිකාරිය නිවේදනයක් නිකුත් කරමින් පරිසර හිතකාමී මැතිවරණ ව්‍යාපාරය රටට ආදර්ශයක් වන බව පවසයි.
නිකුත් කර ඇති නිවේදනයේ මෙසේද කියවෙයි. ''දීර්ඝ කාලයක් තිස්සේ මෙරට දේශපාලන සංස්කෘතිය ගොඩනැගී පැවතියේ, පරිසර හිතකාමී නොවන මහජන පීඩා ගෙන දෙන ආකාරයෙන් ය. පූර්ව මැතිවරණ ප්‍රචාරයන්හී දී පොලිතීන් ඉතා බහුල ලෙසින් භාවිතා කිරීම නිසා ඒවා අපද්‍රව්‍යයක් බවට පත් වූ පසු විසඳාලිය නොහැකි බරපතල පාරිසරික ප්‍රශ්න ගණනාවක් ම ඇති විය.
ජල මාර්ග අවහිර වීම, පහසුවෙන් දිරා නොයෑම නිසා පස දූෂණය වීම, ඩෙංගු, මැලේරියා වැනි වසංගත රෝග ඇතිවීමට හේතු වීම, පරිසරය අවලස්සන වීම වැනි තත්ත්වයන් ඒ අතර ප්‍රධාන විය.
මේ වනවිට ශ්‍රී ලංකීය දේශපාලඥයන් වගේම ඔවුන්ගේ ආධාරකරුවන් ද සතුටුදායක ආකාරයෙන් සිය දේශපාලන ප්‍රචාරක යාන්ත්‍රණය පරිසර හිතකාමී ආකාරයෙන් සකස් කර ගැනීම සුබවාදී දේශපාලන ප්‍රවේශයකට ගමන් කිරීමේ පෙරනිමිති පහළ කිරීමකි.
ඒ සඳහා ප්‍රායෝගික ක්‍රියාකාරීත්වයෙන් ම මාර්ගෝපදේශනය ජාතියට ලබාදෙන, පරිසර විෂයභාර අමාත්‍යවරයා වශයෙන් අතිගරු ජනාධිපතිතුමන්ටත්, පරිසර හිතකාමී මැතිවරණ ව්‍යාපාරයක් වෙනුවෙන් අපගේ ඉල්ලීමට අවධානය යොමු කරමින් පක්ෂ ක්‍රියාකාරීන් දැනුම්වත් කිරීමට කටයුතු කළ මැතිවරණ කොමසාරිස්තුමන් ඇතුළු සමස්ත කාර්ය මණ්ඩලයටත් කෘතවේදීත්වය පළ කරන්නෙමු.''
