මෙහිදී සමූපකාර සේවක කොමිෂන් සභා නීතිය, කොබෝනයා, මගේ ගුරුතුමා, සිදත් සඟරාවේ ඉටු අනිටු හා ලකර අදියර විමසුම ඇතුළු අනුමත වූ ග්‍රන්ථ 10ක් සඳහා කර්තෘවරුන්ට මුද්‍රණ ආධාර ලබා දීම වෙනුවෙන් ගිවිසුම් අත්සන් කිරීම සිදු කෙරිණි.
මෙම ව්‍යාපෘතිය තුළින් ශ්‍රී ලංකාවේ ග්‍රන්ථ සංවර්ධනය සඳහා විශාල දායකත්වයක් ලබා දීමට ශ්‍රී ලංකා ජාතික පුස්තකාලයට හැකියාව ලැබී තිබේ.
1984 වසරේ ආරම්භ කරන ලද මෙම ව්‍යාපෘතියේ අරමුණ වන්නේ ලේඛන හැකියාවෙන් යුත් මෙරට සිටින ආධුනික ලේඛකයන්ට මෙන්ම ප්‍රවීණ ලේඛකයන්ට තම කෘති ප්‍රකාශයට පත් කර ගැනීම සඳහා මුද්‍රණ අනුග්‍රහය දැක්වීමයි.
ප්‍රකාශන ආධාර ව්‍යාපෘතිය සඳහා ඕනෑම රචකයෙකුට සිය පර්යේෂණ කෘති, යොවුන් හා සාහිත්‍යය කෘති, ශාස්ත්‍රීය, නිර්මාණාත්මක හෝ විවිධ විෂය කෘති සහ ළමා කෘති යනාදී වූ විවිධ කාණ්ඩ යටතේ ග්‍රන්ථ ඉදිරිපත් කිරීමේ හැකියාවක් පවතී.
එසේම මෙම ව්‍යාපෘතියේ දිගුවක් ලෙස පර්යේෂකවරුන් වෙනුවෙන් පර්යේෂණ කෘතියක් සඳහා රුපියල් ලක්ෂයේ සිට ඉහළට ආධාර මුදල් ලබාදීම ද මේ වසරේ සිට ආරම්භ කරනු ලැබීය.
මෙම අවස්ථාවට අධ්‍යක්ෂ (රා/ඉ) සේනානි බණ්ඩාර, සහකාර අධ්‍යක්ෂ ශ්‍රීමා සුරියබණ්ඩාර ඇතුළු ආයතන කළමනාකාරීත්වය හා ලේඛකයින් පිරිසක් එක්ව සිටියහ.
