ශ්‍යාමෝපාලී මහා නිකායේ අස්ගිරි මහා විහාර පාර්ශවයේ ගරු ලේඛකාධිකාරී පූජ්‍ය ආණමඩුවේ ධම්මදස්සි නායක ස්වාමීන් වහන්සේ ඇතුළු අස්ගිරි පාර්ශවයේ කාරක සංඝ සභාවේ අනුශාසකත්වයෙන් සහ මග පෙන්වීමෙන් අස්ගිරි විහාරයේ පැවති සාකච්ඡාවේදී මෙම කරුණු අනාවරණය විය.
ඒ අනුව, අතිපූජ්‍ය සංඝරත්නය පෙරටු කොටගත් රථ පෙරහරකින් අස්ගිරි මහා විහාරයේ සිට ඩී.එස්.සේනානායක වීදිය ඔස්සේ ශ්‍රී දළදා මාළිගාව වෙත පෙරහරකින් වැඩම කොට ඓතිහාසික මගුල් මඩුව වෙත වැඩම කිරීමෙන් අනතුරුව අක්තපත්‍ර ප්‍රදානය කිරීමේ පූජෝත්සවය පැවැත්වීමට කටයුතු යොදා තිබේ. අක්තපත්‍ර ප්‍රදානය කිරීමේ පූජෝත්සවයෙන් අනතුරුව නැවතත් යටි නුවර වීදිය ඔස්සේ මහා සංඝරත්නය පෙරටු කොටගත් පෙරහර නැවත අස්ගිරි විහාරය වෙත වැඩම කිරීමට නියමිතය.
අස්ගිරි මහා විහාර පාර්ශවයේ 22 වැනි මහානායක ස්වාමින් වහන්සේ ලෙස අතිපූජ්‍ය වරකාගොඩ ශ්‍රී ඥානරතනාභිධාන මහානායක ස්වාමීන් වහන්සේ පසුගියදා අස්ගිරි පාර්ශවයේ විංසත්වර්ගික කාරක සංඝසභාවේ හිමිවරු විසින් නිතරගයෙන් තෝරාපත් කර ගනු ලැබු අතර, උන් වහන්සේ අස්ගිරි පාර්ශවයේ උරුලෑවත්ත සංඝ පරම්පරාවෙන් බිහි වූ 10 වැනි මහ නායක හිමියෝ වෙති.
අද පැවති මෙම සාකච්ඡාව සදහා මධ්‍යම පළාත් ආණ්ඩුකාර නිලුකා ඒකනායක, මහනුවර ශ්‍රී දළදා මාලිගාවේ දියවඩන නලමේ ප්‍රදීප් නිලංග දෑල, බුද්ධ ශාසන අමාත්‍යංශයේ ලේකම් වසන්ත ඒකනායක, ජනාධිපති අතිරේක ලේකම් රෝහණ කීර්ති දිසානයක, බෞද්ධ කටයුතු කොමසාරිස් ජනරාල් එන්. කොටවලගෙදර, සහ මහනුවර දිස්ත්‍රික් ලේකම් එච්.එම්.පී. හිටිසේකර යන මහත්ම මහත්මීන් ඇතුළු තවත් රජයේ නිලධාරීන් රැසක්ද සහභාගී වූහ.
AP/DMU-Kandy
