ශ්‍රී ලංකාව තුළ කුඩා තේවතු හිමියන් ලක්ෂ පහක් පමණ තම ජීවිකාව පවත්වා ගෙන යනු ලබන අතර තේ නිෂ්පාදනයෙන් 73% ක්ම නිපදවනු ලබන්නේ කුඩා තේවතු හිමියන් විසිනි. රටට විදේශ විනිමය උපයා දෙන ප්‍රධාන වගාවන් අතර තේ ප්‍රධාන ස්ථානයක් ගනු ලබයි. කුඩා තේවතු හිමියන් රටට ඉතාමත් වැදගත් කාර්යය භාරයක් ඉටු කරන පිරිසකි. මේ නිසාම වැවිලි කර්මාන්ත අමාත්‍ය නවින් දිසානායක මැතිතුමාගේ සංකල්පයකය අනුව කුඩා තේවතු සංවර්ධන අධිකාරියේ සභාපතිතුමාගේ මඟ පෙන්වීම යටතේ “ වැවිලි සවිය ක්‍රීඩා උළෙල 2019 ” ක්‍රීඩා උළෙල පැවැත්වීමට කටයුතු සංවිධානය විය.
රටේ දුවාදරුවන්ට මහඟු කාර්යය භාරයක් ලබා දුන් මහවැලි ක්‍රීඩා උත්සවය ආරම්භ කළේ ගාමිණී දිසානායක මැතිඳුන් විසිනි. එදා එම ක්‍රීඩා උළෙල නිසා දක්ෂ ගම්බද දරුවන් ජාතික තලයට ගෙන යාමට පිටුවහලක් විය. ඒ නිසාම සැඟවුණු දක්ෂතා ඇති රට පුරා විසිරී සිටින කුඩා තේවතු හිමියන්ගේ දරුවන්ට ක්‍රීඩාව තුළින් ඉදිරියට යාමට අවස්ථාවක් මෙම ක්‍රීඩා උත්සවය තුළින් ලබා දීම අරමුණ වේ. ක්‍රීඩා උළෙල කුඩා තේවතු සංවර්ධන අධිකාරිය විසින් සංවිධානය කරයි.
