ඒ අනුව මෙම නිවාස වැඩසටහන දිවයිනේ සෑම මැතිවරණ කොට්ඨාසයකම නිවාස 300බැගින් මැතිවරණ කොට්ඨාස 160 ආවරණය වන ආකාරයෙන් දිවයින පුරා නිවාස 50,000 ඉදිකිරීමට නියමිතය.
ඉදිවන සෑම නිවසක් සඳහා ද 3.73%වැනි අඩු පොලී අනුපාතයක් යටතේ රුපියල් ලක්ෂයක මූල්‍ය අනුග්‍රහයක් ලබාදෙන අතර වසර 10ක් ඇතුළත මෙම මුදල ගෙවා අවසන් කළ යුතු වේ. ඒ වෙනුවෙන් එක් නිවාස ලාභියෙකුට මසකට ගෙවීමට සිදු වන්නේ රුපියල් 1000ක මුදලකි.
මෙම නිවාස තැනීම සඳහා අවමය පර්චස් 20 බැගින් වන ඉඩම් කැබලි රජය විසින් නොමිලේ ලබාදෙන අතර මේ වන විට එම ඉඩම් හඳුනාගැනීම් කටයුතු සිදු කෙරේ.
මෙම ව්‍යාපෘතියේ දී එක් නිවාසලාභියෙකු වෙනුවෙන් රජය විසින් ආයෝජනය කරනු ලබන රුපියල් ලක්ෂයට අමතර ව නිවාසලාභීන් විසින් රුපියල් ලක්ෂ 04ක පමණ මුදලක් යෙදවිය යුතු වේ. නිවාස ඉදිකිරීමේ කටයුතු සඳහා අවශ්‍ය අමුද්‍රව්‍ය වට්ටමි ලබාගනිමින් ඉතා සහනදායි මිලට ලබාදීම ද රජයේ සම්බන්ධීකරණය යටතේ සිදු කෙරේ.
මෙම ව්‍යාපෘතිය සඳහා රජය රුපියල් මිලියන 5000ක් වැය කිරීමට ද නියමිතය.
ඊයේ (13) නිවාස හා සමෘද්ධි අමාත්‍යංශයේ පැවැති ප්‍රවෘත්ති සාකච්ඡාවකදී අමාත්‍ය සජිත් ප්‍රේමදාස මහතා මෙම තොරතුරු අනාවරණය කළේය.
DB
