මේ පිළිබඳ ව මාතලේ දිස්ත්‍රික් ලේකම් හෙලන් ඒ. මීගස්මුල්ල මහත්මියගෙන් රජයේ නිල පුවත් වෙබ් අඩවිය කරන ලද විමසීමේ දී ඇය සඳහන් කළේ මේ වන විට මාතලේ ආරක්ෂිත ස්ථානවල සිටි සියලු ම පිරිස් නිවෙස් කරා පිටත් කර යවා ඇති බවයි.
එසේම මහනුවර දිස්ත්‍රික් තේරීම්භාර නිලධාරී ගාමිණී සෙනෙවිරත්න, නුවරඑළිය දිස්ත්‍රික් තේරීම්භාර නිලධාරී ඩී.පී.ජී. කුමාරසිරි යන මහත්වරුන් පවසන්නේ, මෙසේ ආරක්ෂිත ස්ථානවල රැකවරණය ලබන සියලු ම පවුල් තම නිවෙස් ආසන්නයේ ස්ථාපිත ආරක්ෂිත මධ්‍යස්ථානයන් හි සිටින නිසා ඔවුන් සඳහා ඡන්දය භාවිත කිරීම සඳහා විශේෂ මධ්‍යස්ථාන පිහිටුවා නැති බවත් එම පිරිසට තමාට අදාළ ඡන්දපොළට ගොස් නියමිත පරිදි ඡන්දය දැමිය හැකි බවත් ය.
බදුල්ල දිස්ත්‍රික් තේරීම්භාර නිලධාරී රෝහණ කීර්ති දිසානායක මහතාගෙන් මේ පිළිබඳ කරන ලද විමසීමේදී, ආරක්ෂිත ස්ථානවල සිටින පිරිස නිවෙස් ආසන්නයේ සිටින නිසා අදාළ ඡන්දපොළට යා හැකි බවත් මීරියබැද්ද ප්‍රදේශයේ පමණක් අවතැන් වූ පිරිසට ප්‍රවාහන පහසුකම් සලසා ඡන්දය භාවිත කිරීමට පහසුකම් සලසන බවත් සඳහන් කළේය.
අද (07) ආරක්ෂිත ස්ථාන 78ක, පවුල් 1,588කට අයත් පුද්ගලයන් 5,656 දෙනෙකු ආරක්ෂිත මධ්‍යස්ථානවල රැකවරණය ලබන බව ආපදා කළමනාකරණ මධ්‍යස්ථානය පවසයි.
NDH
