අප්‍රේල් 29, 2024
ග්‍රාම නිලධාරී සේවය ඉතාමත් විශිෂ්ට රාජකාරියක් බවත් දිස්ත්‍රික්කය දිසාපති විසින් ද ප්‍රදේශයේ පාලනය ප්‍රාදේශීය ලේකම් විසින් ද ගමේ පාලනය එහි ප්‍රධාන පරිපාලකයා ලෙස ඔබ විසින් ද මෙහෙයවන අතර ඔබ ගමේ සිටින රාජ්‍ය නිලධාරියා යැයි කොළඹ දිස්ත්‍රික් ලේකම් එච්.ටී. කමල් පත්මසිරි මහතා පැවසීය.
ගමේ ප්‍රමුඛයා විය යුතු ඔබයි. ග්‍රාමීය මට්ටමින් විවිධ රාජ්‍ය ආයතනවලින් නිලධාරීන් පත් කර ඇතත් ඔබ කරන නිර්දේශය ඉහළ පරිපාලනය පිළිගනු ඇත. ඔබ තබන අත්සන එහිදී ප්‍රබලයි. මිනිසුන්ගේ උපතේ සිට විපත දක්වා සිදු වන සියලු කටයුතුවලදී ඔබේ නිර්දේශය ඔබ වගකීමෙන් හා සාධාරණත්වයෙන් ඉටු කළ යුතු වේ. ගමේ ජනතාව සමඟ නිරන්තර සහසම්බන්ධතාවක් ඔබ ගොඩනගා ගත යුතුයි. ජනතාවගේ උප්පැන්න සහතිකයේ සිට මරණ සහතිකය දක්වා වූ සියලු කටයුතු ඔබගෙන් ඉටු විය යුතු බවත් මෙවැනි කාර්යයන් අවංකවත් කාර්යක්ෂමවත් ඉටුකිරීම තුළින් ඔබේ රාජකාරී ජීවිතය සාර්ථක වන බවත් ඔහු සඳහන් කළේය.
දිස්ත්‍රික් ලේකම්වරයා මේ බව පැවසුවේ පසුගියදා දිස්ත්‍රික් ලේකම් කාර්යාලයේ පැවති කොළඹ දිස්ත්‍රික්කය වෙත අලුතින් බඳවා ගත් ග්‍රාම සේවා නිලධාරින් 101 දෙනෙකු සඳහා ස්ථිර පත්වීම් ප්‍රදානය කළ අවස්ථාවේදීය.
තමාගෙන් සේවය බලාපොරොත්තුවෙන් එන ජනතාව සමඟ හොඳ සම්බන්ධීකරණයකින් කටයුතු කළ යුතුයි. ඔවුන්ගේ දුක් ගැනවිලිවලට සාවධානව සවන් දිය යුතුයි. සමහර ග්‍රාම නිලධාරීන් උදව් කර පෙරළා ඔවුන්ගෙන් විවිධ වරප්‍රසාද බලාපොරොත්තු වෙනවා. ඇතැම් නිලධාරීන් තමාට ලැබුණු නිල නිවස පවා වෙනත් අයට බදු දීම නිසා වැරදිවලට දඬුවමක් ලෙස ඔවුන්ගේ සේවය අත්හිටුවන්නටත් තීරණය කළා. මාගේ විශ්වාසය ඔබ එසේ නොවන බවයි. ඔබට පැවරෙන වගකීම හෘදය සාක්ෂියට එකඟව ඉටු කරන්න. එවිට රාජ්‍ය සේවය ශක්තිමත් වෙනවා. අද ඇති තාක්ෂණික ලෝකයත් සමඟ ඔබට ඉදිරියට යන්න වෙනවා. එක රාමුවකට කොටු නො වී විවිධ රාජ්‍ය ආයතන, පුද්ගලයන් සමඟ හොඳ සම්බන්ධීකරණයක් ඇති කර ගැනීමෙන් ජනතා සේවයට ලොකු ශක්තියක් ලැබෙන බවත්" ඔහු සඳහන් කළේය.
NDH/JW-dmu colombo
නවතම පුවත්
රජයේ නිල පුවත් වෙබ් අඩවිය පවත්වාගෙන යනු ලබන්නේ රජයේ ප්‍රවෘත්ති දෙපාර්තමේන්තුවේ නව මාධ්‍ය ඒකකය මගිනි. 1996 වර්ෂයේ මැද භාගයේ දී news.lk නමින් ආරම්භ කළ එය අන්තර්ජාලයට මුදාහරින ලද්දේ 1997 මාර්තු මස 01 දින දීය. එතැන් පටන් සිංහල, දෙමළ හා ඉංග්‍රීසි භාෂාවලින් පවත්වාගෙන යනු ලබයි.
+94 11 366 3040
