අමාත්‍යවරයා මෙම කරුණු අවධාරණය කළේ වසර ගණනාවක් දුම්රිය දෙපාර්තමේන්තුව තුළ පුරප්පාඩුව පැවති දුම්රිය ස්ථානාධිපතිවරුන් 290 දෙනෙකුට නව පත්වීම් ලබාදීම සඳහා පසුගියදා (15) දුම්රිය මූලස්ථාන ශ්‍රවණාගාරයේ පැවති උත්සවයකදීය.
තවදුරටත් කරුණු දැක්වු අමාත්‍යවරයා,
“අද දුම්රිය සේවය නංවන්න එළියෙ ඉදන් උපදෙස් දෙන්න ඕනතරම් උපදේශකවරු මහාචාර්යවරු ඉන්නවා. නමුත් ප්‍රායෝගිකව ඒවා කරන්න කවුරුවත් නැහැ. වසර ගණනාවක් තිස්සේ ඇමතිවරුන් ප්‍රවාහන අමාත්‍යාංශයට පත්වුණා. ඒත් මේ දුම්රිය දෙපාර්තමේන්තුව තුළ ඇතිවෙලා තිබු මානව සම්පත් හිඟය පිරවීමට කිසිම පියවරක් ගෙන තිබුනෙ නැහැ. නිළධාරීනුත් එහෙමමයි. ඇමතිවරු කියන ඕනෑම දෙයකට ඔලුව නමාගෙන වැඩකරගෙන හිටියා. ඇමතිවරයා ලෙසට මම දෙයක් කිව්වත් හරි නම් කරන්න වැරදි නම් කරන්න එපා කියලයි මම නිලධාරීන්ට කියන්නෙ.
අද දින පත්වීම් ලබන දුම්රිය ස්ථානාධිපතිවරුන් වන ඔබලා දුම්රිය ස්ථානය වෙත පැමිණෙන මගීන් වෙනුවෙන් ප්‍රවේශපත්‍ර නිකුත් කිරීම පමණක්ම ඔබගේ රාජකාරිය ලෙස සලකන්න එපා. දුම්රිය ස්ථානය ආකර්ශනීය ලෙස පවත්වාගෙන යාමත්, මගී ජනතාවගේ පහසුව වෙනුවෙන් කටයුතු කල යුතුයි. දුම්රිය දෙපාර්තමේන්තුවට නව ක්‍රමෝපායන් තුළින් ආදායම් ලැබෙන අයුරින් දුම්රිය ස්ථානය හා ඒ අවට පවත්වා ගැනීම ඔබගේ රාජකාරියේම කොටසක් ලෙස හිතලා කටයුතු කරන්න.
වෙළඳ ප්‍රචාරණ කටයුතු, රථගාල්, ආපනශාලා පවත්වා ගැනීම සඳහා ඉඩකඩ සලසා දීම ආදිය තුළින් අපට ආදායමක් ලැබෙනවා සේම, දුම්රිය මගීන්ට ද එය විශාල පහසුවක් ඒ වගේම දුම්රිය ධාවනය සඳහා දුම්රිය දෙපාර්තමේන්තු නිලධාරීන් සමඟ මනා සන්නිවේදනයක් ගොඩනගාගත යුතු බවද, ඔබගෙන් සිදුවන සුළු ප්‍රමාදය හෝ සමස්ත මගී ජනතාවටම බලපාන බව ද ඔබ මතක තබා ගත යුතුයි. විශේෂයෙන් ගුණාත්මක මගී ප්‍රවාහන සේවාවක් පවත්වාගෙන යාමට ඔබත් උපරිම අයුරින් දායකවීම ඔබගේ යුතුකමක්.” යැයිද පැවසීය.
මෙම පත්වීම් ප්‍රදානය කිරීමේ අවස්ථාවට ප්‍රවාහන හා සිවිල් ග්‍රවන් සේවා නියෝජව්‍ය අමාත්‍ය අශෝක් අබේසිංහ, අමාත්යාංශ ලේකම් නිහාල් සෝමවීර සහ දුම්රිය සාමාන්‍යාධිකාරී බී.ඒ.පී. ආරියරත්න යන මහත්වරුන් ඇතුළු නිලධාරීන් පිරිසක් සහභාගී වූහ.
