ප්‍රසංගය සඳහා ප්‍රධාන අමුත්තන් ලෙස සහභාගී වූ ජනාධිපති මහින්ද රාජපක්ෂ මැතිතුමන් හා එම මැතිණිය ශ්‍රී ලංකාවේ ඉන්දීය මහ කොමසාරිස් වයි.කේ. සින්හා මහතා හා ඉන්දියාවේ ප්‍රධාන විධායක නිලධාරී සංසදය සභාපති ගිරිජා සින්හා මහත්මිය හා සන්ජය තිවාරි මහතා විසින් පිළිගන්නා ලදී.
විපක්ෂ නායක රනිල් වික්‍රමසිංහ මහතා, විදේශ කටයුතු පිළිබඳ අමාත්‍ය ජී.එල්. පීරිස් ඇතුළු මැති ඇමතිවරුන් පිරිසක් ද මේ ප්‍රසංගය නැරඹීමට එක්ව සිටිය හ. දෙදහසකට වැඩි ප්‍රේක්ෂක පිරිසක් ප්‍රසංගය නැරඹීමට පැමිණ සිටියහ.
ෂාන් හෙවත් ශාන්තනූ මුකර්ජි සුපිරි ඉන්දීය නළුවන් වන ශාරුක් ඛාන්, සල්මන් ඛාන්, අමීර් ඛාන් හා සයිෆ් අලි ඛාන්ට පසුබිම් ගීත ගායනා කර තිබේ. පසුගිය කාලයේ ඔහු විසින් ගායනා කළ එවන් ගීත රැසක් හා ඉංග්‍රීසි ගීතද මෙම ප්‍රසංගයේ පැය තුනකට අධික කාලයක් පුරා ෂාන් ගායනා කළ අතර ප්‍රේක්ෂකයන්ගේ නොමඳ ප්‍රතිචාර ඔහුට හිමි විය.
ඉන්දියාවේ මෙන්ම ලොව පුරා රටවල් රැසක ප්‍රසංග පවත්වා ඇති ෂාන් ශ්‍රී ලංකාවට පැමිණි පළමු අවස්ථාව මෙයයි.
තමන්ට කොළඹ මෙවන් ප්‍රසංගයක් සඳහා ශ්‍රී ලංකාවේ ඉන්දීය මහ කොමසාරිස් කාර්යාලය විසින් ආරාධනා කිරීම පිළිබඳවත් විශේෂයෙන්ම ප්‍රසංගය නැරඹීමට ශ්‍රී ලංකා ජනාධිපතිතුමන් පැමිණීම පිළිබඳ ව තමන් ඉතා සතුටට පත් වූ බවත් ශාන්තනූ මුකර්ජි පවසා සිටියේය.
SDF
