අමාත්‍යවරයා අද (07) පාර්ලිමේන්තුවේදී කාලාවරෝධ (විශේෂ විධිවිධාන) පනත් කෙටුම්පත ඉදිරිපත් කරමින් මේ බව කීය.

වැඩිදුරටත් අදහස් දැක්වූ අමාත්‍යවරයා මෙසේද පැවසීය. ත්‍රස්තවාදී ක්‍රියා හේතු කරගෙන අධිකරණවලදී තම අයිතිවාසිකම් අනුව ක්‍රියාකිරීමට හෝ තමන් වෙනුවෙන් විත්ති වාචික ඉදිරිපත් කිරීමට නොහැකි වන පුද්ගලයන් එනම් සන්නද්ධ ගැටුම් නිසා අවතැන් වූ හෝ අවාසි සහගත තත්ත්වයකට පත් වූ අයට සහන සලසාදීමේ අරමුණින් මෙම පනත් කෙටුම්පත මඟින් අවශ්‍ය නීතිමය විධිවිධාන සැලසීමට පියවර ගෙන තිබෙනවා. ගැටුම් පැවැති සමයේ සිය වාසස්ථාන අහිමිවීම නිසා අවතැන් වූවන්ට මෙන්ම තම වාසභූමි හා අධිකරණය වෙත ප්‍රවේශවීමට නොහැකිවීම නිසා එම කාලයේදී සිය දේපොළ පිළිබඳ අයිතිවාසිකම් ආරක්ෂා කර ගැනීමට හෝ ක්‍රියාත්මක වීමට නොහැකි පුද්ගලයන්ට මෙම සංශෝධන මඟින් සහන සැ‍ලසෙනවා.

කාලාවරෝධ ආඥාපනත යටතේ දැනට ඇති විධිවිධානවලට අනුව වෙනත් අයෙකුගේ නිශ්චල දේපළ හෝ ඉඩම් සම්බන්ධයෙන් වසර දහයක ප්‍රතිවිරුද්ධ වූ බාධාවන‍්ගෙන් තොරව හා අඛණ්ඩ සන්තකය වසර දහයක් ඇති අයට එම දේපොළවල අයිතිය එම අයට ප්‍රදානය කරමින් අධිකර‍ණයෙන් තීන්දුවක් ලබා ගැනීමට අදාළ පුද්ගලයන්ට හිමිකමක් තිබෙනවා. මෙම විධිවිධාන අදාළ කරගැනීම නිසා බොහෝ තැනැත්තන්ට අහිතකර බලපෑම් ඇති වුණා. එම නිසා කාලාවරෝධ ආඥාපනතේ ඊට අදාළ ප්‍රතිපාදන ගැටුම් හේතුවෙන් අවාසි සහගත තත්ත්වයට පත්වූ තැනැත්තන්ගේ නඩු කටයුතුවලදී බලරහිත කිරීම මෙම සංශෝධනයෙන් සිදු කෙරෙනවා. 1983 මැයි 01 දින සිට 2009 මැයි 18 අතර කාලය තුළ සිදු වූ සිද්ධීන්ගෙන් අවාසි සහගත තත්ත්වයට පත්වූවන්ට මේ මඟින් සහන සැලසෙනවා.