අත්‍යවශ්‍ය ඖෂධ 48ක් සඳහා මිල පාලන ක්‍රමය ගෙන එනු ලැබූවේ සෞඛ්‍ය මිනුම්, විශ්ලේෂණ සහ සේවා, උපදේශනය, තාක්ෂණ සේවා සපයන ජාත්‍යන්තරව පිළිගත් ආයතනයක් වන ඉන්ටර්කොන්ටිනෙන්ටල් අලෙවි සේවා (IMS) ආයතනයේ දත්ත උපයෝගිකරගනිමින් බවත් මෙහිදී නව්‍ය ඖෂධ මිල පාලනයට යටත් කොට නොමැති බවත් අමාත්‍යවරයා පැවසීය.
ඒ මහතා මේ බව සඳහන් කළේ අද (09) රජයේ ප්‍රවෘත්ති දෙපාර්තමේන්තුවේ පැවැති කැබිනට් තීරණ දැනුම්දීමේ ප්‍රවෘත්ති සාකච්ඡාවට එක්වෙමිනි.
ඉතා කල්පනාකාරීව කිසිවෙකුටත් අසාධාරණයක් නොවන අයුරින් මෙම මිල පාලන කටයුතු සිදු කිරීමට කටයුතු කරනු ලැබූ බවත් ඒ හරහා කිසිවෙකුගේ ඖෂධ සමාගමක් වසා දැමීමේ අරමුණක් නොවන බවත් පැවසීය.
"දුම්කොළ සඳහා වන බද්ද 90%ක් දක්වා වැඩිකළ අවස්ථාවේ වෙළෙඳපොළ කඩා වැටී රැකියා අවස්ථා අහිමිවන බවට චෝදනා ඉදිරිපත් කළා. ඒ අවස්ථාවේ දී ඔවුන්ගේ ලාභය 1%යි. නමුත් මේ වන තුරුත් වෙළඳපොළ කඩාවැටීමක් හෝ රැකියා අහිමිවීමක් සිදු ව නැහැ. මේ හරහා ඔවුන්ගේ ලාභය කොයි තරම්ද යන්න සිතා ගත හැකියි".
ඖෂධ 48ක් සඳහා මිල පාලනයක් සිදු කොට ඇතත් තවමත් යම් යම් ස්ථානයන් හි පාලන මිලට ඖෂධ නොමැති බවට මාධ්‍ය වේදීන් විසින් කරුණු ඉදිරිපත් කළ අවස්ථාවේ දී අමාත්‍යවරයා කියා සිටියේ එය හදිසියේ කළ නොහැක්කක් බවත් එබැවින් ඖෂධ වැටලීම් සිදු කරමින් පවතින බවත්ය.
