ඒ මහතා මේ බව ප්‍රකාශ කළේ අද (26) පාර්ලිමේන්තු පරිශ්‍රයේ පැවැති කැබිනට් තීරණ දැනුම් දීමේ ප්‍රවෘත්ති සාකච්ඡාවට එක්වෙමිනි.
මෙම සිදුවීම සිදු වූ මුල් අවස්ථාවේ දී පොලිසිය විසින් මාධ්‍ය වෙත නිකුත් කළ වාර්තාවන්හි මෙය හදිසි අනතුරුක් බවට දැක්වූ නමුත් පසුව පශ්චාත් මරණ පරීක්ෂණයේ දී වෙඩි තැබීමක් හේතුවෙන් එක් තරුණයෙකු මරණයට පත් ව ඇති බවත් අනාවරණය වී ඇති බව කී අමාත්‍යවරයා මෙම සිදුවීම සම්බන්ධයෙන් නිවැරදිම ප්‍රකාශයක් සිදු කළ හැක්කේ පොලිස් පරීක්ෂණවලින් අනතුරුව බවත් පෙන්වා දුන්නේය.
උතුරේ සිදු වූ මෙම සිද්ධිය සම්බන්ධයෙන් විවිධ පුද්ගලයන්ට විවිධ කෝණයන්ගෙන් බලා විවිධ ප්‍රකාශ සිදු කළ හැකි බවත් සඳහන් කළේය.
"මෙම සිදුවීම සිදු වූ අවස්ථාවේ දී පොලිසියේ නිලධාරීන් සිතන ආකාරය මෙන් ම ක්‍රියාකළ ආකාරය සම්බන්ධයෙන් ද සිතා බැලිය යුතු වෙනවා. මෙම තරුණයින් දෙදෙනා බිය කිරීම උදෙසා ඉහළට වෙඩි තැබූ බවට පොලිස් නිලධාරීන් විසින් ප්‍රකාශ කරනවා. ඒ සම්බන්ධයෙන් සැකයක් පවතිනවා නමුත් මෙම සිදුවීම සිදුව ඇත්තේ රාත්‍රි කාලයේදීයි. ඒ සම්බන්ධයෙන් ද සිතිය යුතුයි. එමෙන් ම වෙඩි තැබීම නොසිතූ අයුරින් සිදු ව ඇත්දැයි කියා සිතිය යුතුයි" යැයි ද අමාත්‍යවරයා කීය.
මෙම සිද්ධිය සම්බන්ධයෙන් පහළ නිලධාරීන් හට පමණක් දඬුවම් ලබා දී ඇතත් ඒ සම්බන්ධයෙන් ඉහළ නිලධාරීන්හට කිසිඳු දඬුවමක් ලබා නොදීම සම්බන්ධයෙන් මෙහිදී මාධ්‍ය වේදීන් විසින් අමාත්‍යවරයාගෙන් ප්‍රශ්න කළේය. එහිදී අමාත්‍යවරයා සඳහන් කළේ එම අවස්ථාවේ දී රාජකාරියේ යෙදී සිටින නිලධාරීන්ට පමණක් මේ වන විට වැඩතහනමකට ලක් කොට ඇති බවත් සියලු පරීක්ෂණවලින් අනතුරුව වරදකරුවන් වන සියලු දෙනා වෙනුවෙන් දඬුවම් ලබාදීමට කටයුතු කරන බවත් අමාත්‍යවරයා වැඩිදුරටත් පෙන්වා දුන්නේය.
