අද පෙරවරු 10.05ට පමණ එමිරේට්ස් EK 651 දරන ගුවන් යානයෙන්, කටුනායක බණ්ඩාරනායක ජාත්‍යන්තර ගුවන්තොටුපොළින් ජනාධිපතිතුමා ඇතුළු දූත පිරිස පිටත්ව ගියහ.
බ්‍රිතාන්‍ය අග්‍රාමාත්‍ය ඩේවිඩ් කැමරන් මහතාගේ ප්‍රධානත්වයෙන් රටවල් රැසක රාජ්‍ය නායකයන්ගේ සහ නියෝජිතයන්ගේ සහභාගිත්වයෙන් දූෂණ විරෝධී අන්තර්ජාතික සමුළුව හෙට (12) ලන්ඩන් නුවරදී ආරම්භ කෙරෙන අතර ජනාධිපතිතුමා එදින සමුළුව ඇමතීමට නියමිතව තිබීම විශේෂත්වයකි.
බ්‍රිතාන්‍ය අග්‍රාමාත්‍යවරයා විසින් ජනාධිපතිතුමාට මේ සමුළුවට එක්වන ලෙස ආරාධනා කරන ලද්දේ පසුගිය ජනවාරි මස මෝල්ටා හි පැවති පොදුරාජ්‍ය මණ්ඩලයීය රාජ්‍ය නායක සමුළුවේදීය.
සංචාරය අතරතුරදී ජනාධිපති මෛත්‍රීපාල සිරිසේන මහතා, බ්‍රිතාන්‍ය අග්‍රාමාත්‍ය ඩේවිඩ් කැමරන් මහතා සමඟ ද්විපාර්ශවික සාකච්ඡා පැවැත්වීමට නියමිතය.
(ඡායාරූප - ජනාධිපති මාධ්‍ය අංශය )
