අප්‍රේල් 20, 2024
වෙසක් උත්සවයට සමගාමීව පාසල්වල ලබන වසරේ සිට සම්පූර්ණ දවස පුරා වෙසක් වැඩසටහන් ක්‍රියාත්මක කිරීම සඳහා වන නව චක්‍රලේඛයක් නිකුත් කිරීමට අධ්‍යාපන අමාත්‍යංශයේ ලේකම්වරයාට උපදෙස් ලබා දුන් බව අධ්‍යාපන අමාත්‍ය බන්දුල ගුණවර්ධන මහතා පැවසීය.
අමාත්‍යවරයා මේ බව සඳහන් කළේ පසුගියදා වෙසක් උත්සවය වෙනුවෙන් කොළඹ ආරක්ෂක සේවා විද්‍යාලයේ පැවති තරග සඳහා ත්‍යාග හා සහතිකපත්‍ර ප්‍රදානය කිරීමේ අවස්ථාවට එක්වෙමිනි. මේ පාසලේ "විරු දරු" වෙසක් කලාපය හා දන්සැල ද අමාත්‍යතුමා අතින් විවෘත විය.
එහිදී අමාත්‍යවරයා ප්‍රකාශ කළේ වෙසක් වැඩසටහන්වලදී බොදු බැති ගී, වෙසක් සැරසිලි, වෙසක් කලාප යනාදිය ද පාසල් තුළ මෙදින ක්‍රියාත්මක කිරීමට නියමිත බවයි.
මෙවර වෙසක් සතිය දරුවන්ගෙන් ආරම්භ වූ අතර තවත් බුද්ධ වර්ෂ 2600ක් ගෙවී ගියද දරුවන් වෙසක් දිනයට පෙර සිල් සමාදන්වීමේ දිනය වෙනස් නොවන බවත් මේ වසරේ ලක්ෂ 20කට වැඩි බෞද්ධ දරුවන් සිල් සමාදන් වූ බවත් එය රටේ බෞද්ධ සංස්කෘතික උරුමයන් ආරක්ෂා කරමින් ජාතිකාභිමානයක් ඇති කරවන්නක් බවත් අමාත්‍යවරයා මෙහිදී පෙන්වා දුන්නේය.
විෂය බාහිර දැනුම දරුවන්ට අතිශයින් වැදගත් වේ. විභාග කේන්ද්‍රීය අධ්‍යාපනය හේතුවෙන් දරුවන්ගේ එම දැනුම ගිලිහී යන බවත් වැඩිහිටියන් දන්නා අටපට්ටම් කූඩුව සෑදීම වැනි දේ දරුවන් ද ඉගෙන ගත යුතු බවත් අමාත්‍යවරයා වැඩිදුරටත් පැවසීය.
නවතම පුවත්
රජයේ නිල පුවත් වෙබ් අඩවිය පවත්වාගෙන යනු ලබන්නේ රජයේ ප්‍රවෘත්ති දෙපාර්තමේන්තුවේ නව මාධ්‍ය ඒකකය මගිනි. 1996 වර්ෂයේ මැද භාගයේ දී news.lk නමින් ආරම්භ කළ එය අන්තර්ජාලයට මුදාහරින ලද්දේ 1997 මාර්තු මස 01 දින දීය. එතැන් පටන් සිංහල, දෙමළ හා ඉංග්‍රීසි භාෂාවලින් පවත්වාගෙන යනු ලබයි.
+94 11 366 3040
