අමාත්‍යවරයා මේ බව ප්‍රකාශ කළේ අද (05) පෙරවරුවේ රජයේ ප්‍රවෘත්ති දෙපාර්තමේන්තුවේ පැවති මාධ්‍ය සාකච්ඡාවකදී ය.
19 වැනි ව්‍යවස්ථා සංශෝධනය සම්මත කරමින් රට තුළ ඇති කළ වෙනස්කම් 20 වැනි සංශෝධනය මගින්ද ඉටුවනු ඇති බවට එක්සත් ජාතීන්ගේ මහලේකම් බැංකි මූන් මහතා ඊයේ පස්වරුවේ (04) ජනාධිපති මෛත්‍රිපාල සිරිසේන මැතිතුමා වෙත දුරකතන ඇමතුමක් දෙමින් සිය ප්‍රසාදය පළ කර තිබේ. නව රජයේ ඉදිරි වැඩපිළිවෙළ සාර්ථක කර ගැනීමට අවශ්‍ය සෑම සහයෝගයක්ම ලබාදෙන බව එක්සත් ජාතීන්ගේ සංවිධානයේ මහලේකම් බෑන්කි මූන් මහතා එම සංවාදයේ දී වැඩිදුරටත් ප්‍රකාශ කර ඇති බව වාර්තා වේ.
අපේ රටේ පසුගිය කාලය තුළදි බෙදුම්වාදී ත්‍රස්තවාදය පරාජය කිරීමට යෑමේ දී විශේෂයෙන් අපේ රට පිළිබඳව ජාත්‍යන්තරයේ වැරදි මත හා වැරදි අවබෝධ තිබුණ බවත් අපේ රටේ ඇතැම් පිරිස් විදේශ රටවල් සමඟ කටයුතු කළ ක්‍රමය සහ ඇති කරගත් ප්‍රශ්න සමඟ විවිධ රටවල් අප සමඟ අමනාපකම් ඇති කර ගත් බවත් ශාන්ත බණ්ඩාර අමාත්‍යවරයා ප්‍රකාශ කළේය.
මේ වනවිට වත්මන් ජනාධිපති මෛත්‍රිපාල සිරිසේන මැතිතුමාගේ රාජ්‍ය තාන්ත්‍රික සබඳතා, එම මිතුදම් සම්බන්ධව එතුමාගේ විශ්වාසය සහ එතුමාගේ පාලනය පිළිබඳවත් මේ රටේ ඇතිව තිබෙන ප්‍රජාතන්ත්‍රවාදය පිළිබඳවත්, ජනාධිපතිතුමා විශේෂයෙන්ම පසුගිය කාලයේ 19 වෙනි ව්‍යවස්ථාව සංශෝධනය හරහා තමන්ගෙ බලය ඇත් හැරීම පිළිබඳවත් මීළඟට ඇති කිරීමට සූදානම්වන 20වෙනි ආණ්ඩුක්‍රම ව්‍යවස්ථා සංශෝධනය හරහා මේ රටේ ඇතිවන නව ප්‍රජාතන්ත්‍රවාදී මැතිවරණ ක්‍රමය සම්බන්ධවත් අද ජාත්‍යන්තරය තුළත් කතාබහ ඇති වෙලා තිබෙන බවත් ඔහු එහිදී පෙන්වා දුන්නේය.
“සමහරවිට කෙනෙකුට කියන්න පුළුවන් දැන් ඔන්න මේක දෙන්නම් කියලා පොරොන්දු වෙලා තමයි මේ රට ගැන ඔය විදියෙ වාක්‍ය ගන්නෙ, ප්‍රසාදය ගන්නේ කියලා ඒත් එහෙම එකක් නෑ. කිසිම දෙයක් පාවා නොදී රටේ ප්‍රතිපත්තිය ආරක්ෂා කරගෙන රටත් ජනතාවත් ආරක්ෂා කරගෙන තමයි ජාත්‍යන්තරය ජයග්‍රහණය සඳහා මෛත්‍රිපාල සිරිසේන ජනාධිපතිතුමා කටයුතු කරගෙන යන්නේ. ශ්‍රී ලාංකික ජනතාව හැටියට අපි අද සතුටු විය යුතුයි විදේශ රටවල විශාල ප්‍රසාදයක් අප රට කෙරෙහි ඇති වෙලා තියෙන එක ගැන.
ඉදිරි කෙටිකාලය තුළ දි විදේශ රටවල් ගණනාවකින්ම සෘජුවම ජනාධිපතිතුමාට ආධාර විශාල ප්‍රමාණයක් ලබා දෙන්න එකඟ වෙලා තියෙනවා. ඒ ආධාර ලබා ගැනීම හරහා අපේ සංවර්ධන ව්‍යාපෘති ක්‍රියාත්මක කරලා මේ රට ඉදිරියට ගෙන යන්න එතුමා ක්‍රියාකරනවා. විදේශ රටවල ශක්තිය උපයෝගී කරගනිමින් රට ජාත්‍යන්තර තලය කරා රැගෙන යන්න මේ වන විට ජනාධිපතිතුමා කටයුතු කරගෙන යනවා.“ යැයි ද අමාත්‍යවරයා වැඩිදුරටත් සඳහන් කළේය.
SDF
