ශ්‍රි ලංකාවට පැමිණි තායිලන්ත අග්‍රාමාත්‍යතුමා සහ මෙරට ජනාධිපති රනිල් වික්‍රමසිංහ මැතිතුමා සමග ඇති කරගත් වෙළද ගිවිසුම අනුව තායිලන්ත තානාපති කාර්යාලය විසින් එරට ධීවර ෂේත්‍රයේ නියැලෙන ව්‍යාපාරිකයින් කණ්ඩායමක් සමග පසුගියදා( 01) ධීවර මාත්‍යංශයේදි ධීවර අමාත්‍ය ඩග්ලස් දේවානන්දා මහතා හමුවී ධීවර ෂේත්‍රයේ ආයෝජනය කිරීම පිළිබදව සොයා බැලීය.
තායිලන්ත වෙළෙද නියෝජිත පිරිස තායිලන්ත තානාපතිවරයාගේ ප්‍රධානත්වයෙන් පැමිණි අතර එම ව්‍යාපාරික ප්‍රජාව මෙරට ධීවර ෂේත්‍රයේ ආයෝජනය කිරීමට බලාපොරොත්තුවන ෂේත්‍රයන් පිළිබදව අමාත්‍යවරයා දැනුවත් කළේය.
මෙහිදි ධීවර අමාත්‍ය ඩග්ලස් දේවානන්දා මහතා ප්‍රකාශ කර සිටියේ ජනාධිපතිතුමා ප්‍රමුඛ වත්මන් රජය විදේශ ආයෝජකයින්ට මුල්තැනදී කටයුතු කරන බවත් ඒ අනුව තායිලන්ත අග්‍රාමාත්‍යවරයා සමග ඇතිකරගත් වෙළද ගිවිසුම තුළමෙම ව්‍යාපාරිකයින් ශ්‍රී ලංකාවේ ධීවර ෂේත්‍රයේ ආයොජනය කිරීමට පැමිණිම තමන් ඉතා අගය කොට සළකන බවත් ශ්‍රී ලංකාවේ ධීවර ෂේත්‍රයේ ව්‍යාපාරිකයින් සමග සියලු සම්බන්ධතා ධීවර අමාත්‍යංශය හා ධීවර දෙපාර්තමෙන්තුව හරහා සකස් කර දීමට කටයුතු කරන බවද ඔවුන් සමග එක්වී අවශ්‍ය ව්‍යාපෘති සකස් කොට ශ්‍රී ලංකාවේ ආයෝජනය කිරීමට අවශ්‍ය පියවර ගන්නා ලෙස තමන් ඉල්ලා සිටින බව ප්‍රකාශ කළේය.ඒ සදහා ශ්‍රී ලංකා රජයෙන් සහ ධීවර අමාත්‍යංශයෙන් දියයුතු උපරිම සහයද ලබාදීමට කටයුතු කරන බව අමාත්‍යවරයා වැඩිදුරටත් පැවසීය.
මෙම අවස්ථාවට ධීවර අමාත්‍යංශයේ ලේකම් නයනා කුමාරි සෝමරත්න මෙනවිය,ධීවර දෙපාර්තමේන්තුවේ අධ්‍යක්ෂක ජනරාල් සුසන්ත කහවත්ත මහතා ඇතුලු උසස් නිලධාරින් පිරිසක් සහභාගි විය.
