රාජ්‍ය නැකත් කමිටුව මඟින් සකස් කරන ලද නැකත් සීට්ටුවට අනුව සිංහල හා දෙමළ අලුත් අවුරුදු නැකත් චාරිත්‍ර ඉටු කරන ලෙස බුද්ධශාසන, ආගමික හා සංස්කෘතික කටයුතු අමාත්‍යාංශය ජනතාවගෙන් ඉල්ලා සිටියි. 2024 වර්ෂය සඳහා වන නැකත් සීට්ටුව සහ එය සකස් කිරීම සඳහා ප්‍රවීණ ජ්‍යෙතීර්වේදීහු 22 දෙනකුගෙන් සමන්විත කමිටුවක් දායක වී ඇතැයි එම අමාත්‍යංශයේ ලේකම් සෝමරත්න විදානපතිරණ මහතාගේ අත්සනින් නිකුත් කළ නිවේදනයක දැක්වේ.
එම නිවේදනයේ මෙසේද දක්වා තිබේ.
1993 වර්ෂයේ සිට ප්‍රවීණ ජ්‍යෝතීර්වේදීන්ගෙන් සමන්විත රාජ්‍ය නැකත් කමිටුව රැස්වී ආදාළ වර්ෂය සඳහා නැකත් සීට්ටුව සකසා ප්‍රසිද්ධියට පත් කිරීම මෙතෙක් පැවැති සම්ප්‍රදාය වේ. 2024 වර්ෂයට අදාළ සිංහල අවුරුදු නැකත් සීට්ටුව ද ඒ ආකාරයෙන්ම සකස් කර රාජ්‍ය පරිපාලන ස්වදේශ කටයුතු පළාත් සභා හා පළාත් පාලන අමාත්‍යාංශය විසින් 2023-10-02 දිනැතිව ප්‍රසිද්ධ කිරීමට අනුමැතිය ලබා දී ඇත. මෙම නැකත් සීට්ටුව සකස් කිරීමට දායක වී එම නැකත් ශාස්ත්‍රානුකූලව සහ නිවැරදි බවට එකඟ වී මෙම කමිටු සාමාජිකයන් විසින් ඊට අත්සන් කර ඇති අතර ඒ අත්සන් තබා ඇති ජ්‍යෝතීර්වේදියකු සහ තවත් සුළු පිරිසක් සමඟ සම්බන්ධ වී මෙතෙක් පැවැති සම්ප්‍රදායික ක්‍රමවේදයට අභියෝග කරමින් නොයෙක් සමාජ මාධ්‍ය ඔස්සේ නැකත් සීට්ටුව සම්බන්ධයෙන් විරෝධතා දක්වා ඇත. මෙතෙක් සමාප්‍රදායිකව පැවැති ශ්‍රී ලාංකේය සංස්කෘතික අනන්‍යතාවට යම් හානිකර තත්ත්වයක් ඇති කිරීම සඳහා මේ පිරිස කටයුතු කරන බව පැහැදිලි වේ. එබැවින් මෙම පිරිස සිදු කරන විරෝධතාවන් අපගේ සංස්කෘතික සම්ප්‍රදායට පටහැනි බැවින් විවිධ මතිමතාන්තරවලට නොරැවටී රාජ්‍ය නැකත් චාරිත්‍ර සිදු කරන ලෙස ජනතාවගෙන් ඉතා කරුණාවෙන් ඉල්ලා සිටිනු ලැබේ. ජී. එම්. ගුණපාල, ම.ලි. සුගතපාල, චමත් කොතලාවල, එන්. බන්දු ජයතිලක, නුමින්ද ශාන්තසිරි ද සිල්වා, රංජිත් ඕපාත, සරත්චන්ද්‍ර බෝතලාගේ, චමීර බියන්විල, සංජීව කුළුපන බණ්ඩාර, ඊ.ඩී.එම් විජයසිරි, පී.ඩී මලවිගේ, ඒ.කේ.යු සරච්චන්ද්‍ර, අසංක බලපිටිය, රේණුක වික්‍රමසිංහ, විපුලි සිසිර කුමාර, ජී.ආර්.එස්. කේ. ගම්ලත්, එස්. බී තිලකරත්න, ආනන්ද සෙනවිරත්න, ඉන්දික ඈපා සෙනවිරත්න, නන්දන පී. විදුරුවන්, ලෝලනී රණසිංහ යන ප්‍රවීණ ජ්‍යෝතීර්වේදීහු 2024 වර්ෂය සඳහා වන නැකත් සීට්ටුව සහ එය සකස් කිරීමේ කමිටු සාමාජිකයෝ වෙති.
ඒ අනුව 2024 සිංහල අවුරුදු නැකැත් සීට්ටුව පහත දැක් වේ
