පොදු ප්‍රවාහන බස්රථ හේතුවෙන් සිදුවන විවිධ අනතුරු සම්බන්ධයෙන් පාර්ලිමේන්තු මන්ත්‍රී නිරෝෂන් පෙරේරා මහතා යොමු කළ වාචික ප්‍රශ්නයකට පිළිතුරු දෙමින් අමාත්‍යවරයා මේ බව පැවසීය.
වැඩිදුරටත් අදහස් දැක් වූ ප්‍රවාහන අමාත්‍යවරයා පැවසුවේ,
දෙපාර්තමේන්තු ක්‍රමයට මෙරට දුම්රිය දියුණු කරන්න බැහැ. ලෝකයේ අනෙක් සැම රටක්ම දෙපාර්තමෙන්තු ක්‍රමයෙන් මිදී දුම්රිය ඉදිරියට ගමන් කරල තිබෙනවා. අපි කැබිනට් පත්‍රිකාවක් ඉදිරිපත් කළා දුම්රිය දෙපාර්තමේන්තුව අධිකාරියක් බවට පත් කරන්න. කේන්ද්‍රිය පරිපාලනයක් වෙනුවට විමධ්‍යගත පරිපාලනයක් ඇති කිරිමට මෙමගින් බලාපොරොත්තු වෙනවා.කැබිනට් මණ්ඩලය මේ සඳහා විශේෂඥ කමිටුවක් පත් කර තිබෙනවා. විෂයානුබද්ධ වියතුන්ගෙන් මෙම කමිටුව සමන්විතයි. එම කමිටුවේ නිර්දේශ ලැබුණු වහාම එය පාර්ලිමේන්තුවට ඉදිරිපත් කරන්න බලාපොරොත්තු වෙනවා
මාර්ගවල බහුලව සිදුවන අනතුරු සඳහා එකම විසඳුම ඩිජිටල්කරණය බවද ප්‍රවාහන අමාත්‍යවරයා පෙන්වා දුන්නේය. බස්වල ජී.පී.එස් සවිකරන්න. දුම්රිය සහ බස්රථ සඳහා ඊ- ටිකටින් ඇති කරන්න අපි උත්සාහ කරනවා. නමුත් එම ව්‍යාපෘති ක්‍රියාවට නැංවීම බොහොම අපහසුයි.මෑතකදී හඳුන්වා දුන් විදුලි බස් රථ 200ක ව්‍යාපෘතිය තවමත් ක්‍රියාවට නංවන්න බැරි වුණා. එළඹෙන වසරේදී හෝ මෙම ව්‍යාපෘති ක්‍රියාවට නංවන්න බලාපොරොත්තු වෙනවා. මහනුවර ගැටඹේ ගුවන් පාලම, කොහුවල ගුවන් පාලම ඇතුළු පාරවල් සංවර්ධනය කිරීමේ ව්‍යාපෘති මේ වන විට සම්පූර්ණයෙන් නතර වී තිබෙනවා. මීට කිසිදු දේශපාලන විසඳුමක් නැහැ. ආණ්ඩු වෙනස් වුවත්, ජනාධිපතිවරු වෙනස් වුවත් විදෙස් ණය ප්‍රතිව්‍යුහගත කරන තෙක් මුදල් ලැබෙන්නේ නැහැ.
වැඩිදුරටත් අදහස් දැක් වූ ප්‍රවාහන අමාත්‍යවරයා පෙන්වා දුන්නේ, විදෙස් ණය ප්‍රතිව්‍යුහගත කරන තෙක් මහාමාර්ග අලුත්වැඩියාව සඳහා කිසිදු මුදලක් නොලැබෙන බවයි
