පාර්ලිමේන්තු ප්‍රතිසංස්කරණ හා ජනමාධ්‍ය අමාත්‍යංශ ශ්‍රවණාගාරයේ අද (15) පැවති මාධ්‍ය හමුවේදී ඒ මහතා මේ බව සඳහන් කළේය.
සාමාන්‍යයෙන් වසර 4කට වරක් පැවැත්වෙන මෙම සංගණය මෙවර එකළොස්වැනි වරට පැවැත්වෙන බව පෙන්වා දුන් ඒ මහතා මෙම සංගණනය සඳහා ආයතන 28,000ක් පමණ ලැයිස්තු ගත කර තිබෙන බව ද සඳහන් කළේය.
මෙම සංගණනය පිළිබඳ සියලු තොරතුරු ඇතුළත් වෙබ් පිටුවක් එම දෙපාර්තමේන්තුවේ වෙබ් අඩවිය වන www.statistics.gov.lk ට පිවිසීමෙන් ලබා ගැනීමට හැකිය. මේ අනුව, සෑම සේවා නියුක්තිකයෙකුටම මේ වෙබ් අඩවියේ ඇතුලත් තොරතුරු පරිශීලනය කර සංගණන ප්‍රශ්නාවලිය සම්පූර්ණ කිරීමට අවස්ථාව ලැබේ.
මෙම සංගණන දිනය වන විට රාජ්‍ය සහ අර්ධ රාජ්‍ය අංශයේ සේවය නියුතු කාර්යය මණ්ඩලය ගණන් ගැනීම සහ එම කාර්යය මණ්ඩලය පිළිබඳව ප්‍රජා විද්‍යාත්මක, සමාජීය සහ ආර්ථික තොරතුරු එක් රැස් කෙරෙන් බවත් මීට සමගාමීව තෝරාගත් ආයතන වත්කම් පිළිබඳව තොරතුරු රැස්කිරීමත් සිදු කෙරෙන බව ජාතික ප්‍රතිපත්ති සහ ආර්ථික කටයුතු අමාත්‍යාංශය ලේකම් එම්. අයි.එම්. රෆීක් මහතා පැවසීය.
මෙවර සංගණනයේ විශේෂත්වයන් කිහිපයක් තිබෙන අතර මෙවර මුලු රටම ආවරණය වන පරිදි සියලුම රාජ්‍ය හා අර්ධරාජ්‍ය සේවකයින් එක් දිනක් තුළ හා එකම කාල පරිච්ජේදයක් තුළ ගණන් ගැනීම සිදු වේ. ඒ වගේම රාජ්‍ය අංශයේ සේවා නියුක්තියට අමතරව මෙවර තෝරාගත් ආයතනික වත්කම් කිහිපයක් පිළිබඳවත් තොරතුරු රැස් කෙරේ. සියලුම රාජ්‍ය හා අර්ධ රාජ්‍ය ආයතනවල පූර්ණ ලැයිස්තුගත කිරීමක් සිදු කර පවත්වනු ලබන ප්‍රථම සංගණනය මෙම සංගණනයයි. ඒ වගේම, අර්ධ රාජ්‍ය අංශය යටතේ එන වතු ක්ෂේත්‍රයේ සේවයේ නියුතු වතු අංශයේ සේවා නියුක්තිකයින් ද ප්‍රථම වතාවට මෙම සංගණනයට ඇතුලත් කර ගැනීම සිදු වේ. මේ අනුව, මෙවර රාජ්‍ය හා අර්ධ රාජ්‍ය අංශයේ සේවා නියුක්තිය පිළිබඳ සංගණනය ඉතා සුවිශේෂි සංගණනයක් වේ.
