ලෝක බැංකුවේ දකුණු ආසියානු කලාපය භාර උප සභාපතිනි ඇනට් ඩික්සන් (Annette Dixon) මහත්මිය කියා සිටියේ වත්මන් පාලනය යටතේ රට තුළ පවතින මූල්‍ය විනය ඊට හේතුවී ඇති බවයි.
ඇය මේ බව සඳහන් කළේ ඊයේ මුදල් අමාත්‍යාංශයේ (30) මුදල් අමාත්‍ය රවී කරුණානායක මහතා සමඟ පැවැති විශේෂ හමුවක දී ය.
ලෝක බැංකුව මගින් ශ්‍රී ලංකාව වෙත ලබා දුන් ණය, සංවර්ධන ක්‍රියාවලිය සඳහා යොදවා ගෙන ඇති ආකාරය නිරීක්ෂණය කිරීම ඩික්සන් මහත්මියගේ දෙදින නිල සංචාරයේ අරමුණ වේ.
ශ්‍රී ලංකාව ඉතා කඩිනමින් සිය ඉලක්ක සපුරාලීම හේතුවෙන් තවදුරටත් සහයෝගය ලබා දීම සිදු කළ හැකි බව පෙන්වා දුන් ඇය සංවර්ධන ව්‍යාපෘති කඩිනම් කිරීම සම්බන්ධයෙන් මෙහි දී ශ්‍රී ලංකාවට ප්‍රසාදය පළ කළා ය.
මුදල් අමාත්‍ය රවී කරුණානායක මහතා එහි දී කියා සිටියේ ජනාධිපති මෛත්‍රීපාල සිරිසේන මැතිතුමාගේ සහ අගමැති රනිල් වික්‍රමසිංහ මැතිතුමාගේ මග පෙන්වීම යටතේ ශ්‍රී ලංකාව තුළ මුල්‍ය විනය සහ විනිවිදභාවය ශක්තිමත් කරමින් දීර්ඝ කාලීන ආර්ථික සංවර්ධන ව්‍යාපෘති පවත්වාගෙන යන බවයි. සංවර්ධන ව්‍යාපෘති තවදුරටත් කඩිනම් කිරීමට අපේක්ෂාව බවත්, ඒ සඳහා ලෝක බැංකුව වැනි ආයතනවලින් ලැබෙන සහය අතිශය අගය කරන බවත් අමාත්‍යවරයා වැඩිදුරටත් පෙන්වා දුන්නේ ය.
මෙම අවස්ථාවට ලෝක බැංකුවේ ශ්‍රී ලංකා අධ්‍යක්ෂිකා ආචාර්ය අයිඩා ස්වරායි රිඩ්ඩිහවු, භාණ්ඩාගාර නියෝජ්‍ය ලේකම් එස්. ආර්. ආටිගල, විදේශ සම්පත් දෙපාර්තමේන්තුවේ අධ්‍යක්ෂ ජනරාල් ප්‍රියන්ත රත්නායක යන මහත්ම මහත්මීහු ද එක්ව සිටියහ.
