එතුමා මේ බව කියා සිටියේ ශ්‍රී ලංකා වරාය අධිකාරියේ අන්තර් කොට්ඨාස ක්‍රීඩා උළෙලේ සමාප්ති උළෙලට සහභාගි වෙමිනි. ශ්‍රී ලංකා වරාය අධිකාරියේ 37 වැනි සංවත්සර සැමරුමට සමගාමීව මෙම ක්‍රීඩා උළෙල ගාලුමුවදොර පිටියේදී ඊයේ අවසන් විය. සමාප්ති උළෙල ඇමතූ අමාත්‍ය අර්ජුන රණතුංග මැතිතුමා වැඩිදුරටත් කියා සිටියේ වරායේ සෑම සේවකයෙක්ම ක්‍රීඩකයෙක් කිරීමේ ව්‍යාපෘතියක්ද මේ වනවිට ආරම්භ කර ඇති බවයි.
“සියලුම සේවකයින් ක්‍රීඩාවට යොමු කිරීමේ වැඩ පිළිවෙළක් අපි මේ වනවිට වරාය අධිකාරියේ ආරම්භ කර තිබෙනවා. මෙයින් බලාපොරොත්තු වන්නේ තාවකාලික දෙයක් නෙවෙයි. සාමාන්‍ය භාෂාවෙන් කියනවා නම් බොහෝවිට බර වැඩ කරන අපේ සේවකයින්ගේ සෞඛ්‍ය තත්ත්වය රැක ගැනීම වැදගත්. ඒ සඳහා සකස් කළ මූලික ව්‍යාපෘතියේ මුල් අදියර ලෙස තමයි අපි මේ ක්‍රීඩා උත්සවය පැවැත්වූවේ....” යැයිද අර්ජුන රණතුංග මහතා පැවසීය.
ශ්‍රී ලංකා වරාය අධිකාරියේ සැමරුම් ක්‍රීඩා උළෙලට නෙට්බෝල්, වොලිබෝල්, ක්‍රිකට්, පාපැදි සහ මාර්ග ධාවන තරග ඇතුළත් විය. එහිදී ක්‍රිකට් ශුරතාව ශ්‍රී ලංකා වරාය අධිකාරියේ සන්නිවේදන සහ මහජන සම්බන්ධතා කොට්ඨාසයත්, වොලිබෝල් පිරිමි ශූරතාව ලේකම් කාර්යාලයත්, නෙට්බෝල් ශූරතාව ක්‍රියාකරවන කොට්ඨාසයත් දිනා ගත්තේය.
එහි සමාප්ති උළෙලට මුත්තයියා මුරලිදරන්, උපුල් චන්දන සහ චමින්ද වාස් යන මහත්වරුන් විශේෂ ආරාධිත අමුත්තන් ලෙස එක් විය. ශ්‍රී ලංකා වරාය අධිකාරියේ සභාපති ධම්මික රණතුංග, උපසභාපති මහාචාර්ය ප්‍රසන්න පෙරේරා, කලමනාකරණ අධ්‍යක්ෂ සරත් කුමාර ප්‍රේමචන්ද්‍ර යන සම්භාවනීය අමුත්තන් රැසක්ද ඊට සහභාගි වූහ.
AP
