අම්පාර ඉන්ද්‍රසාර මහ විදුහල් ක්‍රීඩාංගනයේ පැවති ජාතික යොවුන් ක්‍රීඩා උළෙලට සමගාමී අම්පාර දිස්ත්‍රික් තරගාවලියේ ත්‍යාග ප්‍රදානෝත්සවයට එක් වෙමින් ඒ මහතා මේ බව සඳහන් කළේය.
මෙහිදී වැඩිදුරටත් අදහස් දැක්වූ අමාත්‍ය දයා ගමගේ මහතා,
“ක්‍රීඩාව කියන්නේ දරුවන්ට පමණක් නෙවෙයි තරුණ වැඩිහිටි සියලු දෙනාටම වැදගත් ක්‍රියාකාරකමක්. ඒ විතරක් නෙවෙයි, ක්‍රීඩාව මගින් සියලුම ජාතීන් අතර සුහදත්වය ඇති වෙනවා. අම්පාර දිස්ත්‍රික්කයේ සියලුම ජාතීන්වලට අයත් වැසියන් ජීවත් වෙනවා. මේ ජාතීන් අතර මිත්‍රත්වය හා සංහිදියාව ඇති වෙන්න ක්‍රීඩාව වඩාත් වැදගත් වෙනවා. වසර 30 ක් පුරා පැවති යුද්ධය අවසන් වීමෙන් පසු එකිනෙකා අතර විශ්වාසය හා සබඳතාව ඇති කර ගනිමින්, ශ්‍රී ලාංකිකයින් හැටියට ජාත්‍යන්තරය ජය ගැනීමට හැකියාව තියන දක්ෂ තරුණ තරුණියන් අපි සතුව සිටිනවා.
යුද්ධය හේතුවෙන් සෑම ක්ෂේත්‍රයකටම අර්බුදයකට මුහුණ දීමට සිදු වුණා. ක්‍රීඩාව පමණක් නෙවෙයි, අධ්‍යාපනය තුළත් විශාල ප්‍රශ්න වලට මුහුණ දෙන්න සිදු වුණා. දැන් දැන් අපි ක්‍රීඩාවෙන් හා අධ්‍යාපනයෙන් දක්ෂ දරුවන්ට කිසිදු බාධාවකින් තොරව ඉදිරියට යන්න පුළුවන් පසුබිමක් නිර්මාණය කරමින් සිටිනවා.
අම්පාර දිස්ත්‍රික්කය නියෝජනය කරමින් අද මේ තරග වලට සහභාගී වෙලා ඉන්න ඔබ, හෙට දවසේ දී ජාතික සහ ජාත්‍යන්තර තලය ජය ගන්නා දක්ෂයින් බවට පත් වේවි.“
මෙහිදී මෙම තරග වලින් පළමු දෙවන තෙවන ස්ථාන දිනාගත් ක්‍රීඩක ක්‍රීඩිකාවන් වෙනුවෙන් අමාත්‍යවරයා අතින් සම්මාන ප්‍රදානය ද සිදු කෙරිණි.
මේ අතර, මේ වසරේ ශිෂ්‍යත්ව විභාගය සඳහා සහභාගී වන සිසු සිසුවියන් වෙනුවෙන් දයාසරණ සංවර්ධන පදනම මගින් සංවිධාන කරන සම්මන්ත්‍රණ මාලාවේ තවත් එක් සම්මන්ත්‍රණයක් අමාත්‍ය දයා ගමගේ මහතාගේ ද සහභාගීත්වයෙන් අම්පාර දයා ඇපරල් ශ්‍රවණාගාරයේ දී පැවැත්විණි.
මීට සමගාමීව, එම දරුවන්ගේ මව්පියන් වෙනුවෙන් අධ්‍යාත්මික හා මනෝවිද්‍යා වැඩමුළුවක් ද සංවිධාන කර තිබිණි.
මෙහිදී අදහස් දැක්වූ ප්‍රාථමික කර්මාන්ත අමාත්‍ය දයා ගමගේ මහතා කියා සිටියේ, තමා දේශපාලනයට පැමිණීමට බොහෝ කාලයකට පෙර සිටම තම පුද්ගලික ධනය යොදවමින් ආරම්භ කළ දයාසරණ පදනම අද වන විට තමාගේ සහ නියෝජ්‍ය අමාත්‍ය අනෝමා ගමගේ මහත්මියගේ මන්ත්‍රී වැටුප්වල සහ පුද්ගලික ධන පරිත්‍යාගයෙන් වඩාත් ශක්තිමත්ව පවත්වාගෙන යාමට හැකියාව ලැබීම සතුටට කරුණක් බවයි.
“මෙවැනි අධ්‍යාපන හා අධ්‍යාත්මික වැඩසටහන් සංවිධාන කිරීමෙන් අපි බලාපොරොත්තු වෙන්නේ මේ පළාත් වල දරුවන්ගේ අධ්‍යාපන දක්ෂතා, කුසලතා වර්ධනය කිරීම වගේම ඔවුන් අධ්‍යාත්මිකව දියුණු පිරිසක් බවට පත් වුණු පිරිසක් බවට පත් කිරීමයි.“
මෙම අවස්ථාවට දරුවන් හා දෙමව්පියන් විශාල පිරිසක් සහභාගී වී සිටියහ.
