ඒ අනුව, හෙට (16) දකුණු කොරියාවේ සිට පැමිණෙන සියලු ම ගුවන්යානාවල මගීන් කටුනායක ගුවන්තොටුපළේ ඇති සෞඛ්‍ය ඒකකයේදී පූර්ව පරීක්ෂාවකට ලක් කිරීමට කටයුතු කරනු ඇත. දකුණු කොරියාවේ මෙන්ම මැදපෙරදිග සිට පැමිණෙන සියලු ම දෙනා ගුවන්තොටුපොළ සෞඛ්‍ය ඒකකයට වාර්තා කරන ලෙසත් සෞඛ්‍ය අමාත්‍යාංශය ඉල්ලා සිටියි. මර්ස් වෛරසය හේතුවෙන් මේ වන විට දකුණු කොරියාවේ මරණ රැසක් සිදු වී ඇති අතර මෙම වෛරසයෙන් ආසාදනය වන දහදෙනෙකුගෙන් තුනක් හෝ හතරක් අනිවාර්යයෙන් මරණයට පත්වේ.
මෙහි රෝගී ලක්ෂණ වන්නේ විශේෂයෙන් කැස්ස, සෙම්ප‍්‍රතිශ්‍යාව, උණ මෙන්ම සමහර රෝගීන්ට පාචනය, වමනය හා ඔක්කාරය වැනි රෝගී තත්ත්වයන්ය. මෙම වෛරසය ආසාදනයවීමෙන් බොහෝ විට මරණයට පත්වන්නේ නියුමෝනියාව වැළඳීමෙනි. අවදානම් සහිත කණ්ඩායම් ලෙස සලකනු ලබන්නේ දීර්ඝ කාලයක් පවතින දියවැඩියාව, පෙනහළු රෝග, වකුගඩු රෝගවලින් පෙළන අය සහ ගැබිනි මවුවරුන්ය.
