නේපාල රජයේ නිල ගණනය අනුව අද (28) උදෑසන වනවිට මෙම ආපදාවෙන් මිය ගිය සංඛ්‍යාව 4,310 දක්වා ඉහළ ගොස් ඇති අතර තුවාල ලැබූ පුද්ගලයන්ගේ සංඛ්‍යාව 8,000 ඉක්මවා ගොස් ඇත.
එසේම කත්මන්ඩු නුවර හා ඒ අවට ජීවත් වන දහස් ගණනක ජනතාව එළිමහනේ තුන්වන දිනටත් විවෘත පරිශ්‍රයන්හි රාත්‍රිය ගත කරමින් සිටිති. ආහාරපාන, පානීය ජලය සහ විදුලි බලය ප්‍රමාණවත් තරම් නොමැතිබැවින් ද අවට පරිසරය අපිරිසිදු වීම හේතුවෙන් ද රෝග ආදිය වේගයෙන් පැතිරීමේ අවධානම ද ඉහළ යමින් පවතියි.
මේ අනුව නේපාලයේ දිස්ත්‍රික්ක 39ක පුදගලයන් මිලියන 8කට පමණ භූමිකම්පාවේ විපාක බලපෑ ඇති බව ඇස්තමේන්තු කර ඇත. එයින් දිස්ත්‍රික්ක 11ට සෘජුවම භූමිකම්පාවේ විපාක බලපෑ ඇති අතර මෙම ප්‍රදේශවල මිලියන 2කට අධික ජනගහනයක් පීඩාවට පත්ව ඇතැයි එක්සත් ජාතීන්ගේ නේවාසික නියෝජිත ප්‍රකාශ කරයි.
විවිධ ස්ථානවල ඉදිකර ඇති තාවකාලික අවතැන් කඳවුරුවල ජීවත්වන ජනතාවට ද මූලික අවශ්‍යතාවයන් පවා ඉටු කරගැනීමට නොහැකිව අසරණ තත්වයට පත්ව ඇත. ආහාර පාන හා වෛද්‍ය පහසුකම් ලැබීම අවම වීම නිසා මේ තත්වය තවත් උග්‍ර වෙමින් පවතියි.
විශාල කළුගල්, කොන්ක්‍රීට් තට්ටු ඉවත් කිරීමේ කටයුතු පැය 50කට අධික කාලයක් තිස්සේ තවමත් ජනතාව විසින් සිදුකරනු ලබති. එසේම රෝහල් පහසුකම් අවම වීම හේතුවෙන් ද බෙහෙත් ද්‍රව්‍ය හා උපකරණ පහසුකම් අඩු වීම නිසා ජනතාවගෙන් ලැබෙන පැමිණිලි ද ඉහළ යමින් පවතියි.
මූලාශ්‍රය : BBC
