තානාපතිවරයා ඊයේ (31) පස්වරුවේ ජනාධිපති කාර්යාලයේදී ජනාධිපති මෛත්‍රීපාල සිරිසේන මැතිතුමා හමු වූ අවස්ථාවේදී මේ බව සහතික කළේය.
ශී‍්‍ර ලාංකීය ජනතාවගේ මානව හිමිකම් තහවුරු කිරීම උදෙසාත් සංහිඳියාව ගොඩනැගීමටත් වත්මන් රජය ගෙන යන වැඩපිළිවෙළ පිළිබඳ ව මෙහිදී සිය ප‍්‍රසාදය පළ කළ ඩේවිඩ් ඩේලි මහතා රටේ ප‍්‍රජාතන්ත‍්‍රවාදය ශක්තිමත් කිරීමට ගෙන ඇති පියවරයන්ට යුරෝපා සංගමයේ පූර්ණ සහය ලබාදෙන බව ද ප‍්‍රකාශ කළේය.
යුරෝපා සංගමය එල්.ටී.ටී.ඊ සංවිධානය නීති රාමුව තුළ වූ තහනම් ලැයිස්තුවෙන් ඉවත් කර තිබියදී පවා යුරෝපය තුළ එම සංවිධානයේ කටයුතු පිළිබඳ තහනම තවදුරටත් දීර්ඝ කිරීමට තීරණය කර තිබෙන්නේ එවැනි අන්තවාදී සංවිධාන තුළින් ආරක්ෂාවට ඇති ප‍්‍රබල තර්ජනය නිසා බව ද තානාපතිවරයා ප‍්‍රකාශ කළේය.
යුරෝපා සංගමය අතීතයේ සිට ම ශී‍්‍ර ලංකාවට ලබා දුන් ආධාර සහ සහයෝගයෙන් පිළිබඳ මෙහිදී සිය ස්තූතිය පළ කළ ජනාධිපතිතුමා, නව රජයේ නව ආකල්ප සහ මානව හිමිකම් සහ සංහිඳියාව වැඩිදියුණු කිරීමට ගෙන ඇති පියවර සලකා බලා හැකි ඉක්මණින් මත්ස්‍ය අපනයනයට පනවා ඇති තහනම ඉවත් කිරිමටත්, GSP+ සහනය නැවත ශී‍්‍ර ලංකාවට ලබාදීමටත් කටයුතු කරන ලෙස තනාපතිවරයාගෙන් ඉල්ලා සිටියේය.
පසුගිය කාලයේදී ශී‍්‍ර ලංකාව සහ යුරෝපා සංගමය සමඟ සබඳතාවලට යම් පළුදු වීමක් සිදුවූවත් ඒවා මකාදමා තිරසාර සහයෝගිතාවක් ඇති කර ගැනීම නව රජයේ අධිෂ්ඨානය බව ද ජනාධිපතිතුමා ප‍්‍රකාශ කළේය.
ජාතින් අතර සංහිඳියාව සවිමත් කිරීම සඳහා හිටපු ජනාධිපතිනී චන්ද්‍රිකා බණ්ඩාරනායක කුමාරතුංග මැතිණියගේ නායකත්වයෙන් කාර්යසාධක බලකායක් පිහිටුවීම, විධායක බලතල අඩු කිරීම, මැතිවරණ ක‍්‍රමය සංශෝධනය යනාදී වශයෙන් රජය ගෙන ඇති කි‍්‍රයාමාර්ග පිළිබඳව ජනාධිපතිතුමා මෙහිදී විස්තර කළේය.
NDH/priu
