අධ්‍යාපන කටයුතු සඳහා පාසැල් දරුවෙකුට පන්ති කාමර ගොඩනැගිල්ලක් තුළ ජාත්‍යන්තර වශයෙන් පිළිගැනුණු ඉඩකඩ ප්‍රමාණය මෙන්ම අධ්‍යාපනඥයින් විසින් සම්මත නිර්ණායක පදනම් කරගනිමින් ගොඩනැගිලි ඇතුළු සෙසු පහසුකම් ලබාදෙන බව සබරගමු ප්‍රධාන අමාත්‍ය හා මුදල් විෂය භාර අමාත්‍ය මහීපාල හේරත් මහතා සඳහන් කරයි.
ඔහු එසේ සඳහන් කළේ වරකාපොළ ගාමිණි මහා විද්‍යාලයේ තෙමහල් පන්ති කාමර ගොඩනැගිල්ලේ පන්ති කාමර සිසු අයිතියට පැවරීම නිමිත්තෙන් පසුගිය දා පැවති උත්සව සභාව අමතමිනි.
මෙම තෙමහල් ගොඩනැගිල්ල සඳහා සබරගමුව පළාත් සභාව රුපියල් ලක්ෂ 240ක් වැය කරයි. පසුගියදා සිසු අයිතියට පත් කළ එහි පළමු අදියර සඳහා සබරගමු පළාත් සභාව වැය කර ඇති මුදල රුපියල් අසූ ලක්ෂයකි. එම පාසලේ දරුවන්ගේ ප්‍රයෝජනය සඳහා ක්‍රීඩා උපකරණ තොගයක් පරිත්‍යාග කිරීම ද මහ ඇමතිවරයා අතින් සිදු විය.
මෙම අවස්ථාවට පළාත් සභා මන්ත්‍රී උදයකාන්ත ගුණතිලක, විද්‍යාලාධිපති එම්.ඩී.ටී. බණ්ඩාර යන මහත්වරු ඇතුළු නියෝජ්‍ය විදුහල්පති අලව්වේ ඤාණතිලක හිමිපාණෝ ද සහභාගී වූහ.
DB
