ජාතික ආධුනිකත්ව සහ කාර්මික පුහුණු කිරීමේ අධිකාරියේ කෑගල්ල දිස්ත‍්‍රික් මධ්‍යස්ථාන ගොඩනැගිලි සංකීර්ණයට මුල්ගල තැබීමේ උත්සවයට පසුගියදා සහභාගිවෙමින් අමාත්‍යවරයා මේ බව ප‍්‍රකාශ කළේය.
මේ සඳහා රුපියල් මිලියන 18ක මුදලක් වැය කිරීමට ඇස්තමේන්තු කර ඇත.
අමාත්‍ය ඩලස් අලහප්පෙරුම මහතා මෙසේද කීය. "ඉතිහාසයේ සිට අපේ රටේ අධ්‍යාපනයට ස්ථිරසාර වැඩපිළිවෙළක් නොතිබීම ජාතියේ අභාග්‍යයක්. නිදහසෙන් පස්සේ ආණ්ඩුවෙන් ආණ්ඩුවට පමණක් නොව, එකම ආණ්ඩුවේ ඇමතිවරයාගෙන්, ඇමතිවරයාට පවා අධ්‍යාපනයේ ප‍්‍රතිපත්තීන් වෙනස් වුණා. 1994 ආණ්ඩුවේ පළමු පනත වුණේ වෘත්තීය පුහුණු අධිකාරිය පනතයි. එදා කම්කරු හා වෘත්තීය පුහුණු අමාත්‍යවරයා ලෙස වත්මන් ජනාධිපතිතුමා ආරම්භ කළ මේ ආයතනය හරහා නගරයට පමණක් සීමා වී තිබූ කාර්මික අධ්‍යාපනය ගමට ගෙනගියා.
යෞවන සමාජ නිවාස වැඩපිළිවෙළ ආරම්භ කළේ කෑගල්ලේ මාවනැල්ලෙන්. හෘදයාංගම හා මිත‍්‍රශීලී බවින් යුතුව කෑගල්ල දිහා බලන්න අප කෘතවේදී වෙනවා. දිවයින පුරා ඉදිවන විශ්වවිද්‍යාල විද්‍යායතනවලින් එකක් දැරණියගල ආසනයට ලබා දුන්නා. ලබන වසරේ මැද වන විට එහි අධ්‍යාපන කටයුතු ආරම්භ කරන්න නියමිතයි. ජනාධිපතිතුමා කෑගල්ලට ප‍්‍රමුඛත්වය ලබාදෙන ලෙස කරන ලද ඉල්ලීම ඉටුකරනවා. අපේ රටේ කාර්මික අධ්‍යාපනය ආරම්භ වන්නේ 1893දී මරදාන කාර්මික විද්‍යාලය ආරම්භ කිරීමත් සමඟයි. නමුත් අපේ රටට අවශ්‍ය පරිදි වේගයෙන් එය විකාශනය වුයේ නැහැ. ඉතිහාසය පුරාම අපේ රට වෘත්තීය අධ්‍යාපනයට දක්වා තිබෙන්නේ මන්දගාමී ස්වරූපයක්. අපේ රටේ කාර්මික අධ්‍යාපනයේ පළමු උපාධිධාරියා බිහිවන්නේ 2012දීය. කාර්මික අධ්‍යාපනය රටේ ආරම්භ කර ඒ වන විට වසර 122ක්.
ග‍්‍රාමීය කටයුතු පිළිබඳ ජ්‍යෙෂ්ඨ අමාත්‍ය ආතාවුද සෙනෙවිරත්න, තොරතුරු තාක්ෂණ හා විදුලි සංදේශ අමාත්‍ය රංජිත් සියඹලාපිටිය, ජාතික ආධුනිකත්ව සහ කාර්මික පුහුණු කිරීමේ අධිකාරියේ සභාපති චන්දන අරුණදේව යන මහත්වරු මේ අවස්ථාවට එක්ව සිටියහ.
NDH
