මැයි 10, 2024
රඹෑව ප්‍රාදේශීය ලේකම් කොට්ඨාසයේ ගම්මාන රැසක් යා කෙරෙන කොකටියගොල්ලෑව පාලම රුපියල් කෝටි තුනක වියදමින් නවීකරණය කිරීමට පියවර ගැනේ.
නව පාලමේ වැඩ කටයුතු ආරම්භ කිරීම ළමා සංවර්ධන හා කාන්තා කටයුතු අමාත්‍ය තිස්ස කරල්ලියද්ද, විශේෂ ව්‍යාපෘති අමාත්‍ය එස්.එම්. චන්ද්‍රසේන, උතුරු මැද ප්‍රධාන අමාත්‍ය රංජිත් සමරකෝන් යන මහත්වරුන්ගේ ප්‍රධානත්වයෙන් පසුගියදා සිදුකෙරිණ.
කොකටියගොල්ලෑව වාන් ඇළ හරහා මීට පෙර තිබූ පැරණි පාලම මේ වන විට ඉතා අබලන් තත්ත්වයේ පවතින අතර වර්ෂා කාලයේ දී වාන් ඇළ උතුරා යන විට ප්‍රදේශයේ ජනතාවට විශාල ප්‍රවාහන අපහසුතාවන්ට මුහුණදීමට සිදුවිය.ඒ අනුව ආර්ථික සංවර්ධන අමාත්‍යාංශය යටතේ ක්‍රියාත්මක වන දිවයිනපුරා කඩිනමින් පාලම් දහසක් ඉදිකිරීමේ ජාතික වැඩසටහන යටතේ මෙම පාලම ඉදිකෙරේ.මේ අනුව කොකටියගොල්ලෑව ඇතුළු එම ප්‍රදේශයේ ජනතාව මැදවච්චිය සහ කැබිතිගොල්ලෑව නගර සහා මීට පෙර විශාල දුරක් ගෙවා ගිය නමුත් නව පාලම ඉදිකිරීම නිසා එම දුෂ්කරතාවන්ගෙන් ද මිදීමට ජනතාවට හැකි වෙයි.
ජාති, ආගම්, කුල, දේශපාලන ආදී කිසිදු භේදයකින් තොරව සියලු ජනතාවට සමසේ භුක්තිවිඳිය හැකි විශාල සංවර්ධනයක් රට තුළ සිදුවෙද්දී මේ රටේ විපක්ෂය ජාති, ආගම් භේද පතුරුවමින් ආණ්ඩු පිහිටුවීමට නිරර්ථක උත්සහයක යෙදී ඇතැයි මෙහි දී අදහස් දැක්වූ ළමා සංවර්ධන හා කාන්තා කටයුතු අමාත්‍ය තිස්ස කරල්ලියද්ද මහතා ප්‍රකාශ කළේය.
ඉතා පිටිසර ගම්බද පාලමක් ඉදිකිරීමට පවා මෙතරම් විශාල මුදලක් වැයකර තිබීම ගමට, නගරයට කියා මහින්ද රාජපක්ෂ ජනාධිපතිතුමන්ගේ සංවර්ධනයේ වෙනසක් නැති බව සනාථ කිරීමක් බව මෙහි දී අදහස් දැක්වූ විශේෂ ව්‍යාපෘති අමාත්‍ය එස්.එම්. චන්ද්‍රසේන මහතා පැවසීය.රටට විශාල ආදායමක් ගෙනෙන වරාය, අධිවේගී මාර්ග, ගුවන් තොටුපළ වැනි අංශ වැඩි දියුණු කර තිබීම ගැන විපක්ෂය මුනිවත රකින ගමන් අඩුපාඩුවක් ඇත්දැයි වැඩියෙන් සොයා බලන බව ද අමාත්‍ය එස්.එම්. චන්ද්‍රසේන මහතා පැවසීය.උතුරුමැද පළාත් ප්‍රධාන අමාත්‍ය එස්.එම්. රංජිත් සමරකෝන්, පළාත් අධ්‍යාපන අමාත්‍ය කේ.එච්. නන්දසේන, උතුරුමැද පළාත් සභාවේ ආණ්ඩු පක්ෂයේ ප්‍රධාන සංවිධායිකා කල්යානි කරල්ලියද්ද යන මහත්ම මහත්මීහු ද මෙහි දී අදහස් දැක්වූහ.
ECB
නවතම පුවත්
රජයේ නිල පුවත් වෙබ් අඩවිය පවත්වාගෙන යනු ලබන්නේ රජයේ ප්‍රවෘත්ති දෙපාර්තමේන්තුවේ නව මාධ්‍ය ඒකකය මගිනි. 1996 වර්ෂයේ මැද භාගයේ දී news.lk නමින් ආරම්භ කළ එය අන්තර්ජාලයට මුදාහරින ලද්දේ 1997 මාර්තු මස 01 දින දීය. එතැන් පටන් සිංහල, දෙමළ හා ඉංග්‍රීසි භාෂාවලින් පවත්වාගෙන යනු ලබයි.
+94 11 366 3040
