මෙම ඉඩම් ගොඩකිරීම් පිළිබඳ ප‍්‍රදේශවාසීන් විසින් ඊයේ (03) ජනාධිපතිතුමා වෙත කරන ලද පැමිණිල්ලක් අනුව අදාළ පාර්ශව සමග වහාම එම ස්ථානයට ගොස් විමර්ශන කටයුතු සිදුකරන ලෙස ජනාධිපතිතුමා මධ්‍යම පරිසර අධිකාරියේ සභාපතිවරයා වෙත උපදෙස් ලබාදෙනු ලැබීය.
ඒ අනුව මධ්‍යම පරිසර අධිකාරියේ නිලධාරින් සහ ඉඩම් ගොඩකිරීමේ හා සංවර්ධනය කිරීමේ සංස්ථාවේ නිලධාරීන් ජාඇල පොලිසිය සමග එම ස්ථාන වෙත ගොස් විමර්ශන කටයුතු ආරම්භ කළ අතර ජනාධිපතිතුමාගේ උපදෙස් පරිදි එම අනවසර ඉඩම් ගොඩකිරීම් වහාම නවතා දැමීමට පියවර ගන්නා ලදී.
මුතුරාජවෙළ කඩොලාන පාරිසරික පද්ධතියට හානි පමුණුවමින් විශාල භූමි භාගයක සිදු කෙරුණු මෙම අනවසර පහත් බිම් ගොඩකිරීම් සිදු කළ පුද්ගලයන්ට එරෙහිව ඉදිරියේදී නීතිමය කි‍්‍රයාමාර්ග ගැනීමට නියමිතය.
පරිසරයට සහ ජෛව විවිධත්වයට හානිවන අයුරින් සිදුකෙරෙන මෙම අනවසර ඉඩම් ගොඩකිරීම්වලට එරෙහිව පවතින නීතිරීති යටතේ උපරිම දඬුවම් ලබාදීමට ජනාධිපතිතුමා මීට පෙර ද උපදෙස් ලබා දී තිබේ.
