අග්‍රාමාත්‍ය රනිල් වික්‍රමසිංහ මහතා සහ පළාත් සභා ප්‍රධාන අමාත්‍යවරුන් අතර විශේෂ සාකච්ඡාවක් පසුගියදා අරලියගහ මන්දිරයේදී පැවති අතර, දකුණ, බස්නාහිර, නැගෙනහිර, ඌව යන පළාත් ප්‍රධාන අමාත්‍යවරු ඊට සහභාගී වූහ.
සංවර්ධන විශේෂ විධිවිධාන පනත් කෙටුම් පත මගින් සිදු කිරීමට අපේක්‍ෂිත කාර්ය භාරය පිළිබඳව මෙහිදී කරුණු පැහැදිලි කෙරිණි.
මෙමගින් අරමුණු කෙරෙනුයේ පළාත් සභා විෂයයන් මධ්‍යම ආණ්ඩුව යටතට ගැනීමක් නොව, ජාතික සංවර්ධනය සඳහා පළාත් සභා ක්‍රියාකාරී ලෙස සහභාගී කර ගැනීමක් බව අග්‍රාමාත්‍යවරයා පෙන්වා දුන්නේය.
ජාතික සංවර්ධන කාර්යයන් සඳහා පළාත් සභා සම්බන්ධ කරගැනීම ප්‍රතිපත්තිමය වශයෙන් අගය කරන බව ප්‍රධාන ඇමතිවරු පැවසූහ. අනෙකුත් ප්‍රධාන ඇමතිවරුන් සමඟ ද සාකච්ඡා කොට මේ පිළිබද යෝජනාවලියක් කඩිනමින් ඉදිරිපත් කරන බව ද ඔව්හු පැවසූහ.
ඒ යෝජනාවලියට අදාළ සංශෝධන පාර්ලිමේන්තුවේ කාරක සභා අවස්ථාවේදී ඉදිරිපත් කිරීමට අවකාශ ඇති බවද මෙහිදී අග්‍රාමාත්‍යවරයා වැඩිදුරටත් පෙන්වා දුන්නේය.
