2014 වසරේ ලෝකයේ විශිෂ්ටතම ග්‍රාමීය තොරතුරු තාක්‍ෂණ වැඩසටහන ලෙස ශ්‍රී ලංකාවේ “නැණසල” ව්‍යාපෘතිය නම් කෙරේ.
ග්‍රාමීය ජනතාව සහ වරප්‍රසාද අඩු පිරිස් නගාසිටුවීම සඳහා “නැණසල“ තුළින් සිදු කෙරෙන මෙහෙය අගය කරනු වස් මෙම සම්මානය පිරිනැමේ.
ජනාධිපති මහින්ද රාජපක්ෂ මැතිතුමාගේ සංකල්පයක් අනුව ක්‍රියාත්මක “නැණසල” ග්‍රාමීය තොරතුරු තාක්‍ෂණ මධ්‍යස්ථාන පිහිටුවීමේ ව්‍යාපෘතිය තුළින් ශ්‍රී ලංකාවේ දිළිඳු ජනයාට තොරතුරු තාක්‍ෂණ අධ්‍යාපනය සඳහා පුළුල් ඉඩකඩක් ලබා දී ඇතැයි බිල් සහ මෙලින්ඩා ගේට්ස් පදනමේ අධ්‍යක්‍ෂිකා ඩෙබෝරා ජාකොබ්ස් මහත්මිය ප්‍රකාශ කළාය. රටේ තොරතුරු තාක්‍ෂණ සාක්‍ෂරතාව 5% සිට 40% තෙක් වර්ධනය කිරීමට “නැණසල” ව්‍යාපෘතිය සක්‍රියව දායක වී ඇතැයි ඊයේ (18) ප්‍රංශයේ ලියෝන් නුවර පැවැති සම්මාන ප්‍රදානයේ දී ඇය පෙන්වා දුන්නාය. සම්මානය පිරිනැමීම ජාත්‍යන්තර පුස්තකාල විද්වතුන්ගේ සමුළුවේදී සිදුකෙරිණ.
“නැණසල” මගින් පරිගණකයට හා අන්තර්ජාලයට පිවිසීමට දිළිඳු ජනයාට අවස්ථාව සැලසීම තුළින් සමබර සමාජ සංවර්ධනයක් ඇති කිරීමට ජනාධිපති මහින්ද රාජපක්ෂ මැතිතුමා “මහින්ද චින්තන” ප්‍රතිපත්තිය තුළින් ක්‍රමෝපායිකව මැදිහත් වී තිබීම අගය කරන බව මයික්‍රෝසොෆ්ට් නිර්මාතෘ සහ ලොව ධනවත්ම පුද්ගලයා ලෙස සැලකෙන බිල් ගේට්ස් මහතා ප්‍රකාශ කරයි. සම්මාන උළෙල සඳහා ඇමේරිකාවේ සියටැල් නුවර සිට සජීවී ව සුභ පැතුම් පණිවුඩයක් එක්කළ ඔහු වරප්‍රසාද අඩු ජනයා සඳහා තොරතුරු තාක්‍ෂණයට පහසුකම් සැපයීම “නැණසල“ තුළින් අඛණ්ඩව සිදුවනු දැකීම සිය ප්‍රාර්ථනය බව පැවසීය.
“සෑම ජිවිතයකටම එක හා සමාන අගයක් ඇති බව” සිය දර්ශනය කර ගත් බිල් සහ මෙලින්ඩා ගේට්ස් පදනම වාර්ෂිකව ලෝකයේ විශිෂ්ටත ම තොරතුරු තාක්‍ෂණ ව්‍යාපෘතිය තෝරා ගැනීම ස්වාධීනව සිදු කරයි.
ශ්‍රී ලංකාව ලබන ජයග්‍රහණ ඇතැම් පිරිස් අන්තර්ජාතිකව අවතක්සේරු කිරීමට උපක්‍රම සොයන පසුබිමක මෙවැනි කීර්තිමත් අන්තර්ජාතික ඇගැයීමක් ශ්‍රී ලංකාවට ලබා දීම ගැන මහාචාර්යවරයා තොරතුරු තාක්‍ෂණ විද්වතුන්ට හා සම්මාන උළෙලේ විනිශ්ච මණ්ඩලය ලෙස ක්‍රියා කළ විද්වතුන්ට ශ්‍රී ලංකාවේ ස්තූතිය පුද කළේය.
සම්මාන උළෙලේ දී “නැණසල” වැඩසටහන පිළිබඳ ප්‍රධාන දේශනය කළ ICTA ආයතනයේ ප්‍රධාන විධායක නිලධාරි රෙෂාන් දේවපුර මහතා ජනතාව තොරතුරු තාක්‍ෂණයෙන් සවිබල ගැන්වීමට ජනාධිපතිතුමාගේ නායකත්වයෙන් යුතුව ICTA ආයතනය අඛණ්ඩව කටයුතු කරන බව අවධාරණය කළේය.
ECB
