ආහාර උපදේශක කමිටුව විසින් අයිස්ක‍්‍රීම් සහ ආනයනික කිරි පිටි සම්බන්ධයෙන් තීරණ කිහිපයක් මෙහිදී ගනු ලැබූ බව සෞඛ්‍ය සේවා අධ්‍යක්ෂ ජනරාල් වෛද්‍ය පාලිත මහීපාල මහතා පවසයි.ඒ අනුව ආනයනික කිරිපිටිවල ඩී.සී.ඩී. පිළිබඳ පරීක්ෂණ තව දුරටත් අඛණ්ඩව ම සිදු කිරීමටත්, එමෙන්ම අයිස්ක‍්‍රීම්වල ඩී.සී.ඩී. ඇත්දැයි සොයා බැලීමට සිදු කරන පර්යේෂණද කාර්මික තාක්ෂණික ආයතනය හරහා අඛණ්ඩව සිදු කිරීමටද තීරණය කරන ලදී.
කොළඹ මහ නගර සභාවේ සෞඛ්‍ය ඒකකය මගින් ලබා ගන්නා ලද අයිස්ක‍්‍රීම් සාම්පල හයක් මේ වන විට කාර්මික තාක්ෂණික ආයතනය වෙත අදාළ පරීක්ෂණ කටයුතු සඳහා යොමු කර තිබේ. එමෙන්ම තව දුරටත් අයිස්ක‍්‍රීම් සාම්පල ලබා ගැනීමට කටයුතු කරන ලෙසද ආහාර උපදේශක කමිටුව උපදෙස් දී ඇත. තවද අයිස්ක‍්‍රීම් නිපදවන ප‍්‍රධාන ආයතන ඇතුළු සියලු ම ස්ථාන වහාම හදිසි පරීක්ෂාවකට ලක් කිරීමටද තීරණය විය.
මෙම කටයුතුවලට අවශ්‍ය උපදෙස් සැපයීම සඳහා විශේෂ තාක්ෂණික උපදේශක කමිටුවක්ද පසුගිය (31) පත් කරන ලදී.පසු ගිය කාලය තුළ ඩී.සී.ඩී. පරීක්ෂණ කටයුතු අවසන්වන තෙක් වෙළඳපොළට නිකුත් කිරීම අත්හිටුවා තිබූ සහ පසුව විනාශ කළ කිරිපිටි තොග සම්බන්ධයෙන් සකස් කළ වාර්තාවද මෙහිදී ආහාර උපදේශක කමිටුවට බාර දෙනු ලැබීය.
