පසුගිය මාසයේදී 2.8%ක්ව පැවති ලක්ෂ්‍යමය උද්ධමනය, ආහාර අයිතමයන්හි මිල ගණන් ඉහළ යාමේ ප්‍රතිඵලයක් ලෙස 2014 ජූලි මාසයේදී 3.6% දක්වා ඉහළ ගිය ද වසර තුළ මේ දක්වා පහළ තනි ඉලක්කමක මට්ටමක පැවතිණි.
සමස්තයක් ලෙස ආහාර නොවන කාණ්ඩයේ අයිතමයන්හි මිල ගණන් ස්ථාවරව පැවතීම 2014 ජූලි මාසයේ උද්ධමනය පහළ මට්ටමක පවත්වා ගැනීමට දායක වී ඇත. මේ කාණ්ඩය තුළ නිවාස, ජලය, විදුලිය, ගෑස් හා අනෙකුත් ඉන්ධන යන උප කාණ්ඩයෙහි මිල ගණන් පහළ වැටුණු අතර විවිධ භාණ්ඩ හා සේවා උප කාණ්ඩයෙහි මිල ගණන් ඉහළ ගියේය. රෙදිපිළි හා පාවහන්, ගෘහ භාණ්ඩ, ගෘහ උපකරණ හා දෛනික ගෘහ නඩත්තුව, සෞඛ්‍ය, ප්‍රවාහන, සන්නිවේදන, විනෝදාත්මක හා සංස්කෘතික හා අධ්‍යාපන යන අනෙක්තු සියලුම උප කාණ්ඩයන්හි මිල ගණන් පසුගිය මාසයට සාපේක්ෂව 2014 ජූලි මාසයේදී නොවෙනස්ව පැවතිණි.
සමස්ත ඉල්ලුමෙහි විචලනයන්ට ප්‍රතිචාර දක්වන මූලික උද්ධමනය, පසුගිය මාසයට සාපේක්ෂව 2014 ජූලි මාසයේදී සුළු වශයෙන් ඉහළ නැගුණි. ඒ අනුව ලක්ෂෂ්‍යමය හා වාර්ෂික සාමාන්‍ය පදනම මත මූලික උද්ධමනය 2014 ජූනි මාසයේ දී වාර්තා වූ පිළිවෙළින් 3.5%ක් හා 3.0% සිට 2014 ජූලි මාසයේදී පිළිවෙළින් 3.7% සිට 3.1%ක්වා ඉහළ නැඟුණු බවත් මහ බැංකුව නිවේදනය කරයි.
NDH
