අලුත්ගම ප්‍රදේශයේ ඊයේ (15) ඇති වූ සිද්ධිය සම්බන්ධයෙන් කටකතා පැතිරවීම සහ වැරදි අර්ථකතන ලබා දෙමින් විවිධ ප්‍රකාශ සහ නිවේදන නිකුත් කිරීම කිසිසේත් පිළිගත නොහැකි අතර එවැනි ක්‍රියා මාධ්‍ය සදාචාරයට හා ආචාර ධර්මවලට පටහැනිය.
රටේ විවිධ ආගමික කණ්ඩායම් අතර සමඟියට බාධා වන ආකාරයෙන් නිවේදන හා කිසිදු පදනමකින් තොර වාර්තා පළකිරීමෙන් වැළකීම මාධ්‍යයේ වගකීමක් බව රජය අවධාරණය කරයි.
එමෙන්ම, රටේ ජීවත් වන ජාතීන් හා ආගමික කොට්ඨාසයන් අතර වැරදි මත ව්‍යාප්ත කිරීමේ තොරතුරු ලබාදීමෙන් වළකින ලෙස රජය මහජනතාව වෙතින්ද ඉල්ලීමක් කරයි. මෙහිදී පසුගිය දා සිදු වූ ඇතැම් සුළු සිද්ධීන් පවා තාක්ෂණය යොදා ගනිමින් විශාල සිද්ධි ලෙස පෙන්නුම් කිරීමේ තත්ත්වයක් පවත්නා බව පෙනී ගොස් ඇති බැවින් එවැනි කටයුතුවල නොයෙදෙන මෙන් රජය මහජනතාවගෙන් තවදුරටත් ඉල්ලා සිටී.
එසේම, දැනුවත්ව වැරදි තොරතුරු සහ කටකතා පැතිරවීම නීතිමය වශයෙන්ද දඬුවම් ලැබිය හැකි වරදක් බව මෙහිදී පෙන්වා දෙනු ලැබේ.
DB/PUB
