අනාදිමත් කාලයක සිට දකුණු කොරියාව සහ ශ්‍රී ලංකාව අතර දැඩි මිත්‍ර සබඳතාවක් පවතින බවත්, ඒ සබඳතාව තවදුරටත් ආරක්ෂා කර ගැනීමේ අරමුණින් කොරියා රජයේ දායකත්වය ශ්‍රී ලංකාව වෙත ලබාදීමට කොරියානු රජය සෑමවිටකම එකඟ යැයි ද ඒ මහතා පැවසීය.
නව දකුණු කොරියානු තානාපතිවරයා වශයෙන් පත් ඒ මහතා සිය රාජකාරි ආරම්භ කිරීමෙන් අනතුරුව අද (09) පෙරවරුවේ අග්‍රාමාත්‍ය කාර්යාලයේ දී අග්‍රාමාත්‍ය ආචාර්ය දි.මු. ජයරත්න මැතිතුමා හමුවේ මේ බව පැවසීය.
දකුණු කොරියානු රාජ්‍යයේ රැකී රක්ෂා සඳහා වර්තමානය වන විට ශ්‍රී ලාංකිකයන් විශාල පිරිසකට අවස්ථාව ලබාදී ඇති බවත්, එමගින් කොරියාවේ සංවර්ධනය සඳහා ශ්‍රී ලාංකීය දායකත්වය ඉතා විශිෂ්ට බවත් කී ඒ මහතා, වෘත්තීය අවශ්‍යතා මෙන්ම සංචාරක, වෙළඳ ප්‍රවර්ධන, ආයෝජන සහ අධ්‍යාපනික යන ක්ෂේත්‍ර පුළුල් කොට ඒ සඳහා ශ්‍රී ලාංකීයයන් වැඩි වශයෙන් යොමු කරවීමට කටයුතු කරන බව කීවේය. ශ්‍රී ලංකාවේ වසර ගණනාවක් තිස්සේ පැවති යුද්ධයෙන් අනතුරුව රට ලැබූ සංවර්ධනය පිළිබඳව සතුටුදායක විය හැකි බවත්, ලංකාව කිසිසේත්ම කොටස් වශයෙන් බෙදී වෙන් වී නොයා යුතු බවත් ඒ මහතා කීවේය.
කොරියාව දෙකට බෙදී අත්විඳින පීඩාව හොඳින් දැනෙන බව කී ඒ මහතා, ශ්‍රී ලංකා රජයේ ස්ථාවරත්වය සඳහා කොරියාවේ සහයෝගය අඛණ්ඩව ලබාදෙන බවත් වැඩිදුරටත් සඳහන් කළේය.
ශ්‍රී ලංකාවේ තිස් වසරක් තිස්සේ පැවති යුද්ධය නිසා රටේ සංවර්ධනය අඩාල වුවත්, යුද්ධයෙන් අනතුරුව ශ්‍රී ලංකාව සීග්‍ර සංවර්ධනයක් කරා ගමන් කරමින් සිටින බව කී අග්‍රාමාත්‍යතුමා, එම සංවර්ධනය තවදුරටත් ආරක්ෂා කර ගැනීම සඳහා රජයේ ප්‍රතිපත්ති සකස් කරන බව සඳහන් කළේය.
අග්‍රාමාත්‍ය ලේකම්, එස්. අමරසේකර මහතා ද මෙම අවස්ථාවට සහභාගි විය.
ECB
