අධික වර්ෂාව, ජල ගැල්ම හා නාය යෑම් වැනි ස්වාභාවික තත්ත්වයන් හේතුවෙන් පීඩාවට පත් ජනතාවට සහ ජීවිත හානියට පත්වූවන්ගේ පවුල්වල අයට රජය කනගාටුව ප‍්‍රකාශ කර සිටියි.
පීඩාවට පත් වූ ජනතාව ආරක්ෂක ස්ථාන කරා ගෙන යාමට පොලිසිය හා යුද හමුදාව යොදවා ඇති අතර මෙම පවුල් සඳහා සහන සැලසීම ප‍්‍රාදේශීය ලේකම් කාර්යාල මඟින් සිදු කෙරෙනු ඇත. ඒ අනුව, අවතැන් වූ ජනතාවට අවශ්‍ය පිසූ ආහාරපාන ප‍්‍රාදේශීය ලේකම් කාර්යාල මඟින් මේ වන විටත් කඩිනමින් ලබාදීමට පියවර ගෙන ඇත.
මෙම පුද්ගලයින් සඳහා අවශ්‍ය කරනු ලබන පිසූ ආහාරපාන හා වියළි ආහාර කිසිදු හිඟයකින් තොරව ලබාදීමටත් කටයුතු කෙරෙන බව ආපදා කළමනාකරණ මධ්‍යස්ථානය සඳහන් කරයි.
කාලගුණවිද්‍යා දෙපාර්තමේන්තුව හා ආපදා කළමනාකරණ මධ්‍යස්ථානය විසින් වරින්වර ලබාදෙන කාලගුණික තත්ත්වයන් පිළිබඳ තොරතුරු සම්බන්ධව ජනතාව දැඩි අවධානයෙන් සිටීමෙන් සිදුවිය හැකි හානි අවම කරගැනීමට හැකි බව රජය අවධාරණය කර සිටියි.
DB/CMU
