අවසන් දින පැවති නෞකා අභ්‍යාසය නැරඹීම සඳහා ආරක්ෂක අමාත්‍යාංශයේ ලේකම් කරුණාසේන හෙට්ටිආරච්චි, ආරක්ෂක මාණ්ඩලික ප්‍රධානී එයාර් චීෆ් මාෂල් කෝලිත ගුණතිලක, යුද හමුදාපති ලුතිනන් ජෙනරාල් ක්‍රිශාන්ත ද සිල්වා, නාවික හමුදාපති වයිස් අද්මිරාල් රවීන්ද්‍ර විජේගුණරත්න, ගුවන් හමුදාපති එයාර් මාෂල් ගගන් බුලත්සිංහල, නාවික හමුදා නියෝජ්‍ය මාණ්ඩලික ප්‍රධානී හා නැගෙනහිර නාවික විධාන ආඥාපති, නාවික දියත් විධානයේ ආඥාපති, අධ්‍යක්ෂ ජෙනරාල් මෙහෙයුම් ඇතුළු පිරිස ශ්‍රී ලංකා නාවික හමුදාවේ සයුර නෞකාව වෙත පැමිණියහ.
මෙහිදී නෞකාවන් කණ්ඩායම් වශයෙන් හැසිරවීමේ අභ්‍යාස, වෙඩි තැබීමේ අභ්‍යාස, හෙලිකොප්ටර් යානාවක් මගින් නෞකා අතර භාණ්ඩ හා පුද්ගලයන් හුවමාරු කිරීමේ අභ්‍යාස, නෞකාවකට ප්‍රවිශ්ට වී සිදුකරන සෝදිසි කිරීම් හා අත්අඩංගුවට ගැනීම් පිළිබඳ අභ්‍යාස හා සන්නිවේදන අභ්‍යාසයන් මෙම පිරිසට දැක ගැනීමේ අවස්ථාව ලැබිණි.
වරාය ආශ්‍රිතව සිදුකරන මෙහෙයුම් හා මුහුදේ දී සිදුකරන මෙහෙයුම් වශයෙන් අදියර දෙකක් යටතේ පුරා දින 6ක් පැවති මෙම නාවික අභ්‍යාසයට ශ්‍රී ලංකා නාවික හමුදාවේ “සයුර”, “සමුදුර” සහ “සාගර” යන ගැඹුරු මුහුදු නිරීක්ෂණ නෞකාවන් ද, වේග ප්‍රහාරක මිසයිල නෞකාවක් වන “නන්දිමිත්‍ර” නෞකාව ද, වේග ප්‍රහාරක මුර නෞකාවන් වන “රණජය” සහ “රණරිසි” නෞකාවන් ඇතුළු වේග ප්‍රහාරක යාත්‍රා 6ක් ද සහභාගි වූ අතර, ඉන්දීය නාවික හමුදාව නියෝජනය කරමින් “කෝරා”, “කිර්පන්” යන මිසයිල ප්‍රහාරක නෞකාවන් හා ගැඹුරු මුහුදු නිරීක්ෂණ නෞකාවක් වන “සාවිත්‍රි” යන නෞකා ත්‍රිත්වය එක් විය.
DB
