නීති කෙටුම්පත් දෙපාර්තමේන්තුවේ නිලධාරින්, නීති ක්ෂේත්‍රයේ ප්‍රවීණයන්, පාර්ලිමේන්තු නිලධාරින්, ඇතුළු සියලු අංශ ආවරණය වන පරිදි අදාළ නිලධාරින් මේ සඳහා පත්කර ඇත. විකල්ප ප්‍රතිපත්ති කේන්ද්‍රය විසින් කොළඹ දී අඟහරුවාදා (13) පැවැත්වූ විද්වත් කතිකාවකට සහභාගී වෙමින් ව්‍යවස්ථා නීති විශාරද, ජනාධිපති නිතීඥ ආචාර්ය ජයම්පති වික්‍රමරත්නමහතා මේ බව අනිවරණය කළේය.
එහිදි වැඩිදුරටත් අදහස් දැක්වු ආචාර්ය ජයම්පති වික්‍රමරත්න මහතා සඳහන් කළේ මේ සම්බන්ධයෙන් ක්‍රමවේද ගණනාවක් යටතේ අවධානය යොමුවිය යුතු බවයි.
විශේෂයෙන්ම ආණ්ඩුක්‍රම ව්‍යවස්ථා සංශෝධන ක්‍රියාවලියේ දී මහජන මත විමසීම පුළුල් ලෙස සිදුවිය යුතු බව ඒ මහතා පවස යි.
එමෙන්ම මේ සම්බන්ධයෙන් සිදුවන මහජන මතය පාර්ලිමේන්තුවට ගෙනයාම සඳහා විශේෂ කොමිසමක් පත් කළ යුතු අතර පාර්ලිමේන්තුව සිදුකරන ක්‍රියාවලියට අමතරව මහජන ක්‍රියාවලියක් වෙනම සිදුවිය යුතු බවත් ආචාර්ය වික්‍රමරත්න මහතා සඳහන් කළේය.
මෙම ක්‍රියාවලිය සිදුකිරීමේ දී පාර්ලිමේන්තුවම තේරීම් කාරක සභාවක් බවට පත්කර කටයුතු කරන්නේද, පාර්ලිමේන්තු යෝජනා සම්මතයකින් තුනෙන් දෙකේ බලයක් ලබාගෙන ආණ්ඩුක්‍රම ව්‍යවස්ථා සම්පාදන ක්‍රියාවලිය සිදුකරන්නේද යන්න සම්බන්ධයෙන් එකඟතාවකට පැමිණ නොමැති බවත් ආචාර්ය වික්‍රමරත්න මහතා වැඩිදුරටත් කීය.
