දකුණේ පැතිර යන උණ රෝගය හේතුවෙන් රෝගීන් 2510 දෙනෙකු රෝහල් ගත වූ බවත් ළමා මරණ 14 සහ වැඩිහිටි මරණ 01ක් වාර්තා වී තිබෙන බවත් මේ වන විට රෝහල්ගතවීමේ සංඛ්‍යාව අඩුවෙමින් පවතින බවත් අමාත්‍යවරයා පෙන්වා දුන්නේය.
රජයේ ප්‍රවෘත්ති දෙපාර්තමේන්තුවේ අද (06) පැවති මාධ්‍ය හමුවේදී මාධ්‍යවේදීන් නැගූ ප්‍රශ්නවලට පිළිතුරු දෙමින් අමාත්‍යවරයා මේ බව සඳහන් කළේය.
මෙම රෝගී තත්ත්වය පාලනය කිරීම සඳහා රෝගීන්ට ප්‍රතිකාර කිරීමේ පහසුකම් පුළුල් කර තිබෙන අතර ඒ සඳහා විශේෂඥ වෛද්‍ය කණ්ඩායම් පවා යොදවා තිබෙන බව ද සඳහන් කළේය.
රෝග සඳහා ලබාදෙනු ලබන ඖෂධ සම්බන්ධයෙන් තනි තීරණය ගෙන කටයුතු කළ නොහැකි බව පෙන්වා දුන් අමාත්‍යවරයා ඒ සඳහා විශේෂඥ කණ්ඩායම් යොදවා කමිටු මඟින් ලබාදෙනු ලබන තීරණ අනුව කටයුතු කරන බව ද ප්‍රකාශ කළේය. දැඩි සත්කාර ඒකක පහසුකම් වැඩි කර තිබෙන අතර අමතර ස්වසන පහසුකම් උපකරණ 10ක් ද කරාපිටිය රෝහල වෙත ලබාදෙමින් අවශ්‍ය සියලු දේ කර තිබෙන බව ද ඒ මහතා පෙන්වා දුන්නේය.
පසුගිය කාලයේ ඩෙංගු සඳහා එනනතක් ලබාදීම සඳහා ඉල්ලීම් තිබුණු බවත් පරීක්ෂණ අනුව ලෝක සෞඛ්‍ය සංවිධානය එම එන්නත ලබාදීම අවසානයේ ප්‍රතික්ෂේප කළ බව ද අමාත්‍යවරයා මතක් කර සිටියේය.
රෝග ලක්ෂණ පහළ වූ විගස රෝහල් ගතවීමෙන් රෝගය උත්සන්න තත්ත්වයට පත්වීම වළක්වා ගැනීමට හැකි වන බව ද අමාත්‍යවරයා වැඩිදුරටත් පැවසීය.
