ලෝක ආහාර හා කෘෂිකර්ම සංවිධානයේ දායකත්වයෙන් සකස් කරන ලද මෙම ජාතික ප්‍රතිපත්ති කෙටුම්පත ප්‍රථමයෙන් අමාත්‍ය මණ්ඩලයේ අනුමැතිය සඳහා ඉදිරිපත් කෙරෙන අතර, ඉන් අනතුරුව පාර්ලිමේන්තුවේ අනුමැතිය සඳහා ඉදිරිපත් කිරීමට පියවර ගන්නා බව මෙම අවස්ථාවට සහභාගි වෙමින් කෘෂිකර්ම අමාත්‍ය මහින්ද අමරවීර මහතා ප්‍රකාශ කළේය.
මින් පෙර පැවැති ජාතික ප්‍රතිපත්තිය වර්තමාන කෘෂි ක්ෂේත්‍රයට ගැලපෙන පරිදි සකස් කර දෙන ලෙස කෘෂිකර්ම අමාත්‍යාංශය විසින් අවස්ථා කිහිපයක දී ලෝක ආහාර කෘෂිකර්ම සංවිධානයෙන් ඉල්ලීමක් කර තිබිණි.
ශ්‍රී ලංකාවේ ආහාර හා පෝෂණ ආරක්ෂාව සහතික කරලීම සඳහා සහ මෙරට කෘෂිකර්මාන්තයේ තිරසාර සංවර්ධන ඉලක්කයන් ජයගැනීම ඉලක්ක කර ගනිමින් සකස් කරන ලද මෙම ජාතික ප්‍රතිපත්තිය තුළින් වගා ක්ෂේත්‍රයේ කාර්යක්ෂමතාව ඉහළ නැංවීමටත්, වෙළෙඳපොල පවතින තරගකාරිත්වය තුළින් ගොවි ජනතාවට යහපත් ආර්ථික මට්ටමක් ළඟා කර දීමත් මෙමඟින් ඉලක්ක කර තිබේ.
මෙම ප්‍රතිපත්තිය සකස් කිරීමේ දී ලෝක ආහාර හා කෘෂිකර්ම සංවිධානය විසින් ලබා දුන් සහයෝගය අමාත්‍යවරයා මහත් සේ අගය කළේය.
මෙම අවස්ථාවට එම ප්‍රතිපත්තිය සකස් කිරීමට දායකත්වය දුන් ආචාර්ය ඩී. බී. ටී. විජේරත්න මහතා ද, අමාත්‍යාංශයේ ලේකම් බී. විජයරත්න මහතා ඇතුළු පිරිසක් සහභාගි වූහ.
